OÉ-CUSSE, 10 Janeiru 2025 (TATOLI) – Diresaun Rejionál Konservatóriu, Servisu Rejistu Sivíl no Notariadu, Rejiaun Administrativa Espesiál Oé-Cusse Ambeno (RAEOA) fornese ona dokumentu hanesan billete identidade (BI) no sertidaun RDTL ba vítima inséndiu hamutuk uma-kain 11 iha aldeia Buqui, suku Usitasa’e, sub-rejiaun Oésilo.
“Inséndiu iha suku Usitasa’e ne’e ita-nia komunidade sira-ne’ebé dokumentu la konsege salva, ami atende ona sira bazea pedidu husi xefe suku no jestór sub-rejiaun Oésilo nian atu fornese fali dokumentu ba vítima ne’ebé lakon iha dezastre ne’e”, Diretór Konservatóriu, Servisu Rejistu Sivíl no Notariadu Oé-Cusse, Rui Perreira Sequeira, dehan iha Oé-Cusse, ohin.
Dirijente ne’e esplika katak vítima inséndiu sira ne’e nia dokumentu ahi han hotu, entaun Notariadu tenke fó prioridade hodi disponibiliza BI no sertidaun RDTL tanba balun atu asesu ba pensaun sosiál ferik-katuas. “Ba pasaporte laiha, dokumentu seluk hanesan eleitorál ka diploma ne’e la’ós ami-nia kompeténsia”, nia dehan.
Xefe Suku Usitasa’e, Tomás Ulan Colo, agradese ba Notariadu tanba fornese ona dokumentu importante ba vítima sira. “Antes ne’e, ami hatama pedidu no konsege rezolve ona. Ne’ebé, kona-ba apoia materiál kontrusaun mós Governu liuhusi Sekretaria Estadu Protesaun Sivíl entrega ona, agora komunidade halo hela uma foun”, nia relata.
Inséndiu ne’e akontese iha aldeia Buqui, iha suku Usitasa’e, sub-rejiaun Oésilo, iha loron kuarta, 13 Novembru 2024, pur volta tuku 17:30 hodi rezulta ahi han mutuk uma 12 (ida uma adat) no afeta ba membru família hamutuk 48.
Notísia relevante: Autoridade sei fornese dokumentu ba vítima inséndiu Usitasa’e
Jornalista: Abílio Elo Nini
Editora: Maria Auxiliadora
