OÉ-CUSSE, 15 Novembru 2024 (TATOLI) –Autoridade Rejiaun Administrativa Espesiál Oé-Cusse Ambeno (RAEOA) sei fornese dokumentu importante ba vítima inséndiu iha suku Usitasa’e, ne’ebé ahi han mutuk.
“Autoridade sei fasilita diploma, sertidaun RDTL, kartaun eleitorál, billete identidade, rekening ka konta bankária atu imi [vítima] bele asesu fali”, Asesór ba Prezidente Autoridade RAEOA ba Asuntu Sosiál, Agustinho Caet, informa bainhira distribui ai-han iha aldeia Buqui.
Tanba ne’e, nia husu apoia autoridade komunitária sira hodi rekolla no rejista vítima sira-nia dokumentu ne’ebé la konsege salva atu submete identidade ba autoridade RAEOA.
“Ohin mós Sekretária Rejionál Edukasaun fó mensajén mai alin sira-ne’ebé diploma la konsege salva presiza hato’o ba xefe suku atu lori bá Edukasaun. Hanesan mós eleitorál, BI, sertidaun RDTL, atu ita komunika ho parte relevante sira hodi imi bele hetan filafali ho emerjénsia no rekening banku tanba atu simu subsidíu osan ferik-katuas, depois dokumentu sira-ne’e importante nu’udar sidadaun timoroan”, dehan.
Notísia relevante: Insendíu iha Usitasa’e, Palmira Mala lakon osan $6.400
Xefe suku Usitasa’e, Tomás Ulan Colo, dehan kona-ba dokumentu balun arkivu hela iha sede suku no aldeia, nune’e sei komunika atu identifika ho loloos.
“Ha’u hakarak relata katak ita foti ona dadus komesa ohin dadeer, tanba dokumentu balun nia kópia ami arkiva hela iha sede suku no iha aldeia hanesan fixa família, eleitorál, BI no sertidaun RDTL, ne’ebé ami sei identifika loloos atu na’in-hira mak presiza trata dokumentu sira-ne’e”, nia hateten.
Notísia relevante: APC no parseiru apoia ona nesesidade bázika ba vítima inséndiu iha Usitasa’e
Inséndiu ne’e akontese iha loron 13, pur volta tuku 17:30, ne’ebé rezulta ahi han mutuk uma 12 ne’ebé iha membru família 48 no inan-ferik ida konsege hetan kanek no daudaun ne’e hala’o hela tratamentu iha Ospitál Referénsia Oé-Cusse.
Jornalista: Abílio Elo Nini
Editora: Maria Auxiliadora
