OÉ-CUSSE, 15 Novembru 2024 (TATOLI) – Palmira Mala, vítima inséndiu iha aldeia Buqui, suku Usitasa’e, Rejiaun Administrativa Espesiál Oé-Cusse Ambeno (RAEOA), lakon osan $6.400 ne’ebé nia rai hela iha nia uma. Aleinde osan, vítima mós lakon fahi rua ne’ebé nia haki’ak.
Palmira Mala konta katak inséndiu ne’ebé akontese iha loron 13 Novembru ne’e, nia tuur hela iha uma oin, de repente rona ema hakilar katak ahi han uma no akompaña ho anin boot.
“Ema hakilar ho lian-maka’as de repente, ha’u hanoin kala ema hakilar ular ka buat ruma. Hakfodak sira hakilar mai ami dehan amá..amá..do’ok husi uma oin, tanba ahi han ona amá nia uma tutun. Ha’u haree sa’e ba leten ahi komesa suar no anin maka’as liután”, Palmira Mala dehan.
Ho akontesimentu ne’e, halo nia hakfodak no lakon konsentrasaun, nune’e nia labele salva nia sasán. “Hateke ba uma leten, ahi han maka’as ona. Ha’u tenta atu halai tama bá uma laran hodi foti osan sira-ne’e, maibé tama ladi’ak. Ha’u tanis bolu ema atu tama foti osan sira-ne’e, maibé sé mak atu tama tanba ahi maka’as ona. Ha’u tanis de’it iha fatin hodi husu ajuda ba Maromak”, Palmira konta ho matan-been.
“Osan $6.400 ne’e, $400 mak osan ferik-katuas no $6000 ne’e foin daudaun ha’u halo lia, inaugura ha’u-nia uma, oho fahi no karau, família sira mak tau hamutuk osan sira-ne’e, maibé seidauk to’o fulan osan sira-ne’e lakon de’it ona husi ha’u-nia leet, sente laran-moras”, nia salienta.
Notísia relevante: APC no parseiru apoia ona nesesidade bázika ba vítima inséndiu iha Usitasa’e
Nia hatutan katak la’ós osan-tahan de’it mak ahi han, maibé iha mós osan besi, belak no sasán lulik hanesan morten, hare, batar no roupa. “Insidente ne’e ha’u hakilar maka’as bolu ha’u-nia oan sira atu mai ajuda, maibé sira bá hotu serbisu, balun iha toos”, nia realsa.
Foto Tatoli/Abílio Elo Nini
Iha fatin hanesan, vítima Vicente Metan mós konta katak inséndiu akontese bainhira nia bá tiha Neof-Upat hodi vizita nia amá sira, depois mai fali no to’o merkadu Pune mak ema hakilar dehan uma sira ahi han ona.
“Nune’e ha’u halai husi Pune mai to’o ne’e, uma sira-ne’e moos ona. Ha’u-nia sasán la salva. Hare, batar, roupa no osan, inklui ha’u-nia fahi rua mós ahi han mutuk. Hela de’it roupa mak ha’u uza daudaun ne’e”, nia hato’o ho triste.
Maske nune’e, nia reza ba Maromak atu fó saúde di’ak no moris naruk, tanba inséndiu ne’ebé akontese la rezulta família ruma lakon vida.
“Ha’u-nia laran-moras, maibé ha’u agradese ba Na’i Maromak tanba ha’u-nia família kompletu no salva aan husi akonesimentu ne’e. Agora, ami fó fiar ba Governu, karik apoia ami uma no ai-han balun. Ami hetan susar, atu tanis ba sé hodi ajuda ami atu fó ai-han ba tempu naruk no uma hela fatin. Ne’e hanesan ita moris hahú fali husi inísiu tanba sasán lakon ona”, nia hateten.
Iha sorin seluk, Asesór ba Prezidente Autoridade RAEOA ba Asuntu Sosiál, Agustinho Caet, hatán ba preokupasaun vítima sira katak sei hato’o relatóriu ba Prezidente Autoridade hodi konsidera.
“Ami mai lori de’it ai-han balun atu aguenta netik. Agora, kona-ba asuntu sira hanesan ne’e, tanba sasán lakon barak inklui animál sira, ha’u sei hato’o relatóriu ba Prezidente Autoridade hanesan aman ba Oé-Cusse atu haree imi-nia halerik ne’e, ha’u labele promete maibé sei hato’o”, nia afirma.
Foto Tatoli/Abílio Elo Nini
Xefe suku Usitasa’e, Tomás Ulan Colo, dehan inséndiu ne’e kauza uma sira mutuk hotu tanba halo ho du’ut, ne’ebé rikusoin saida de’it mak iha uma laran la konsege salva.
“Hanesan morten ami identifika ona uma ida, señora Palmira Mala nia osan $6.400 mak ahi han hotu, iha uma-kain ida $1000, balun $700 no osan besi ida antigu nian ita la sura, batar no hare inklui animál hanesan fahi neen ka hitu hanesan ne’e mate iha inséndiu ne’e”, Tomás Ulan Colo relata.
Notísia relevante: APC identifika uma-kain 12 iha Usitasa’e sei hetan materiál konstrusaun
Inséndiu ne’e akontese iha loron 13 pur volta tuku 17:30, ne’ebé rezulta ahi han mutuk uma 12 ho halo membru família 48 laiha rezidénsia, no inan-ferik ida konsege hetan kanek no daudaun ne’e hala’o hela tratamentu iha Ospitál Referénsia Oé-Cusse.
Jornalista: Abílio Elo Nini
Editora: Maria Auxiliadora
