iklan

DESPORTU, DILI, HEADLINE

Nilton Gusmão eleitu ba Prezidente FFTL no promete hamoris liga rai-laran

Nilton Gusmão eleitu ba Prezidente FFTL no promete hamoris liga rai-laran

Prezidente Eleitu FFTL, Nilton Telmo Gusmão dos Santos. Imajen Tatoli/Francisco Sony.

DILI, 11 janeiru 2025 (TATOLI) – Kongresu extraordináriu ba kompleta mandatu Estrutura Federasaun Futeból Timor-Leste (FFTL) 2022-2026 ne’ebé realiza iha Otel Novu Turizmu konsege eleitu Nilton Telmo Gusmão dos Santos ba Prezidente períodu tinan ida no promote hamoris hikas liga rai-laran.

Iha kongresu ne’e kongresista sira aprezenta kandiadu na’in-rua mak Nilton Telmo Gusmão dos Santos no Estanislau Baptista. Maibé iha diskursu kandidatura nian Estanislau deside rejigna-aan hodi fó apoiu ba Nilton Gusmão.

Tuir estatutu FFTL nian iha artigu 23 ko’alia katak, iha kongresu pakote rua bainhira pakote ida deside rejigna-aan fó kedas oportunidade ba ekipa ne’ebé mantein atu sai manán-na’in hodi avansa ba oin.

Bainhira Estanislau Baptista rejigna-aan meza foti kedan desizaun hodi fó tempu ba kongresista sira deside, nune’e kongresista sira hamriik basa-liman hodi selebra vitória Nilton Gusmão.

Alende ne’e, kandidatu na’in-rua mós iha sira-nia membru ezekutivu na’in-rua, Nilton nian mak Domingos Caero no Augusto Henrique kandidatura Estanislau nian, ho desizaun ne’ebé Estanislau foti fó kedas oportunidade ba Augusto Henrique mós rejigna-aan. Ho nune’e Domingos Caero mak avansa ho Nilton Gusmão hodi kompleta mandate 2022-2026.

Bainhira eleitu, Nilton promete sei dezenvolve futeból iha Timor-Leste no hamoris hikas Liga Futeból Timor-Leste ne’ebé durante ne’e paradu kuaze tinan tolu ona.

“Ha’u-nia prioridade mak atu hamoris fali liga rai laran nian, kuaze tinan tolu ona mak liga paradu, ida-ne’e mak fó impaktu ba ita-nia futeból,” Nilton promete.

Nia dehan, iha mandatu restu ne’e sei dezenvolve futeból iha nasaun ne’e ho signifikante no sei kontinua hamoris liga futsal, formasaun ba treinadór, arbitrazen sira no jogu ba juvenil sira iha nível nasionál no munisipál.

Alende ne’e, esi-Prezudente interinu FFTL Tenente Jenerál Falur Rate Laek husu ba estrutura eleitu atu hala’o serbisu ho másimu atu dezenvolve futeból iha nasaun ne’e.

“Estrutura ne’ebé eleitu, tenke hatudu imi-nia matenek hodi dezenvolve ita-nia futeból iha nasaun ne’e, lalika rai odiu malu iha imi-nia mandatu, hamutuk atu dezenvolve ita-nia futeból,” Falur fó hanoin.

Kongresista ne’ebé partisipa iha kongresu hamutuk 21 mak hanesan; Asosiasaun Futeból Ainaro, Aileu, Bobonaro, Baucau, Covalima, Dili Leste, Dili Oeste, Lautem, Liquiçá, Manufahi, Manatuto, Viqueque, RAEOA no Ermera.

Nune’e mós Asosiasaun Futeból Femenia, Assosiasaun Futeból Juvenil, Assosiasaun Arbitrajen, Assosiasaun Futsal, klubu kampiaun liga primeiru Karketu Dili FC no kampiaun segunda liga DIT FC.

Kongresu ne’e asiste direita husi reprezentante Federation International Footbal Assosiation (FIFA) no Asian Football Confederation (AFC).

Realiza liga futeból 2025

Prezidente Nilton Telmo Gusmão dos Santos hatete, durante mandatu tinan ida hanesan lideransa FFTL sei buka meiu hodi realiza liga futeból 2025 hodi promove talentu jogadór sira.

“Maske tinan ida de’it iha ha’u-nia mandatu, maibé ha’u komprimetidu atu halo netik buat ruma, programa prinsipál ha’u halo mak tenke reativa liga,” Nilton hateten ba Agência TATOLI iha Novo Turizmu Dili, sábadu ne’e.

Nia dehan, kada tinan Liga Futeból Timor-Leste sempre hetan apoiu orsamentu hosi Governu hodi hala’o atividade jogu, maibé apoiu ne’ebé Governu fó la sufisiente, nu’udar Prezidente ne’e sei buka dalan seluk finansia liga.

“Ita hatene katak liga futeból apoiu orsamentu hosi Governu, maibé Governu ho nia prioridade barak, maibé ha’u promete sei buka solusaun seluk mós atu apoiu ita-nia Governu hodi realiza ita-nia liga, ha’u iha ona esperiénsia kaer liga hatene ona katak, ita atu organiza liga presiza tebes federasaun nia tulun, entaun ha’u sei buka solusaun seluk bainhira orsamentu Governu nian la natoon,” Nilton katak.

Notísia relevante: Asosiasaun Futeból 13 apresia FFTL realiza kongresu hili komite independente

Jornalista: Hortencio Sanchez

Editór: Evaristo Soares Martins

iklan
iklan

Leave a Reply

iklan
error: Content is protected !!