DILI, 13 janeiru 2025 (TATOLI)—Administrasaun Navegasaun Aérea Timor-Leste (ANATL) rekolla ona reseita hamutuk $184.100,43 liuhusi pagamentu ba estasionamentu iha Aeroportu Internasionál Prezidente Nicolau Lobato, Comoro-Dili.
“Ba taxa estasionamentu, ami foin hahú husi fevereiru to’o dezembru 2024, ita kosege rekolla hamutuk $184.100,43 ne’e ba motór no karreta ne’ebé para hela iha aeroportu,” Prezidente Konsellu Administrasaun ANATL, Romualdo António Soares da Silva, informa ba Agência Tatoli, iha ninia knaar fatin, foin lalais ne’e, iha Aeroportu Comoro.
ANATL rekolla taxa estasionamentu tuir oras, ba karreta oras ida selu $1, maibé se para to’o oras 12 maka sei kalkula pakote, nomeadamente ba karreta $25, ba kamioneta no bis $1,50 kada oras, bainhira para karreta ba oras 12 sei selu $40. Enkuantu ba motór sira oras ida $0,50 maibé liu ka para durante oras 12 mak selu $10
Lansamentu ba ekipamentu sistema estasionamentu automátiku iha aeroportu inaugura iha loron 05 dezembru 2023 no implementa iha fevereiru tinan 2024.
“Durante aplika taxa ba estasionamentu, obstákulu ami hasoru dezafiu hanesan ema balun la kompreende ida-ne’e no osan cash ne’ebé ami fornese ladún boot maibé ida atu apoiu ANATL nia rendimentu. Ami sempre fó sosializasaun hodi sira bele kompreende,” nia akresenta.
Notísia relevante : ANATL, E.P rekolla ona reseita millaun $2,8-resin iha tinan 2024
Prezidente ANATL dehan, atu mellora servisu Aeroportu Comoro, daudaun parte responsável sira halo ona reabilitasaun balun hanesan harii portaun entrada no kanopi besik sistema estasionamentu automátiku ne’ebé sei ramata iha fulan-marsu tinan ne’e.
Aleinde ne’e, ANATL mós halo koordenasaun ho Ajénsia Dezenvolvimentu Nasionál (ADN) no Ministériu Obra Públika (MOP) hodi halo reabilitasaun iha terminál Aeroportu liuhusi kontratu ho empreza timoroan, Devita Group.
“Ami fó ona notifikasaun ba empreza sira ne’ebé hala’o atividade iha ne’ebá, semana ne’e bele halo kedas reabilitasaun ba partida depois ne’e kontinua ba parte checking hafoin ba Arrival,” nia akresenta.
Projetu ne’e sei hala’o ho tempu badak tanba kondisaun terminál Aeroportu hetan estragu ba beibeik no tenke iha espansaun ida atubele fornese atendimentu no fasilidade di’ak liu ba pasajeiru sira.
Jornalista : Arminda Fonseca
Editora : Julia Chatarina
