DILI, 09 janeiru 2025 (TATOLI)—Administrasaun Navegasaun Aérea Timor-Leste, Empreza Públika (ANATL, E.P) rekolla ona reseita $2.869.545,26 ba kofre Estadu iha tinan 2024.
Prezidente ANATL, Romualdo António Soares da Silva, hateten, órgaun outónomu ne’e iha kategoria hamutuk 22 atu hetan reseita, maibé daudaun kategoria 12 de’it maka implementa no funsiona, enkuantu seluk seidauk tanba kondisaun no fasilidade iha aeroportu la adekuadu.
“Reseita ne’ebé hetan iha aeroportu ne’e fahe ba kategoria prinsipál rua, hanesan reseita aeronáutika no reseita la’ós aeronáutika. Kategoria sira-ne’e ida-idak iha fonte reseita ne’ebé diferente no kontribui ba reseita totál aeroportu,” Prezidente ANATL, E.P informa ba Agência Tatoli, iha ninia knaar fatin, Aeroportu Internasionál Prezidente Nicolau Lobato, Comoro, kinta ne’e.
Notísia relevante : Setembru, ANATL no FDCH sei haruka bolseiru 29 hala’o iha Indonézia
Reseita husi kategoria 12 kompostu husi taxa aterrajen, taxa seguransa pasajeiru, impostu aeroportu, loket checking, retail shopping, servisu ai-han no bebida, publisidade, servisu estasionamentu, kartaun asesu, aluga propriedade, no seluk tan.
“Reseita kategoria 10 seluk hanesan estasionamentu aviaun, hasai fotografia iha aeroportu no seluk tan seidauk konsege funsiona tanba ita seidauk iha kondisaun no fasilidade adekuadu,” nia akresenta.
Prezidente ANATL hein tinan ne’e Administrasaun bele aumenta tan reseita tanba Governu halo ona koordenasaun ho nasaun oin-oin hodi habelar servisu voo ba Malázia (Batik Air) no seluk tan.
Jornalista : Arminda Fonseca
Editora : Julia Chatarina