iklan

POLÍTIKA

Komunidade afetadu despeju administrativu hetan indemnizasaun husi Governu

Komunidade afetadu despeju administrativu hetan indemnizasaun husi Governu

Vise-Ministru Asuntu Parlamentár, Adérito Hugo da Costa. Imajen Tatoli/Francisco Sony.

DILI, 13 janeiru 2025 (TATOLI)—Vise-Ministru ba Asuntu Parlamentár, Adérito Hugo da Costa, informa komunidade afetadu despeju administrativu hotu-hotu hetan indemnizasaun husi Governu no daudaun ne’e ministériu responsável halo hela prosesu ba Ministériu Finansa (MF) atu halo levantamentu hodi halo pagamentu.

Notísia Relevante: SEATOU-MOP informa prosesu indemnizasaun ba komunidade Fomentu II

“Agora kestaun, kona-ba kompensa ka lae. Loos! Kompensasaun ne’e iha. Númeru valór hanesan ho sira-ne’ebé uluk iha fatin seluk ne’ebé uluk halo eviksaun. Prosesu pagamentu halo depois abertura sistema iha kuarta-feira semana kotuk, bainhira Ministériu Finansa (MF) liuhusi konvokatóriu reuniaun nasionál ba diresaun nasionál halo abertura ba sistema ezekusaun ninian. Sistema loke no ministériu relevante ne’ebé responsável atu halo kompensasaun ba valór sira ne’ebé iha ona. Halo hela prosesu ona ho Ministériu Finansa atu halo levantamentu hodi halo pagamentu ba afetadu sira,” Vise-Ministru ne’e hato’o hodi hatán preokupasaun Deputadu sira-nian iha reuniaun plenária Parlamentu Nasionál (PN), segunda ne’e.

Tanba ne’e, Governu rejista preokupasaun sira kona-ba despeju administrativu hodi hadi’a despeju administrativu sira tuir mai no tenke halo sei la para, no halo intervensaun ba komunidade hela iha área risku dezastre hanesan iha Fomentu II no balun hela iha espasu públiku.

Husu ba komunidade ne’ebé sira-nia tau ona marka númeru husi Governu hanesan iha Fomentu Comoro nian to’o tasi-ibun ne’e, voluntariamente populasaun agora liberta hotu ona inklui mai Pantai Kelapa no PERTAMINA.

“Númeru tau hotu no fatin sira-ne’e tau hotu ona sei laiha tan opsaun seluk. Númeru tau ona no fó no notifikasaun. Signifika, fatin ne’e la’ós ita-boot nian, la’ós fatin privadu no tenke voluntária hamamuk no rai ne’e la’ós konsideradu privadu no uma mós halo temporáriu de’it,” nia hateten.

Antes ne’e, Primeiru-Ministru (PM), Kay Rala Xanana Gusmão, hateten família uma kain sira-ne’ebé hetan despeju administrativu tanba konstrui uma iha área risku dezastre naturál hanesan iha mota ninin Comoro ne’e sei hetan indemnizasaun.

“Hotu-hotu sei hetan. Laiha ema ida-ne’ebé la hetan indemnizasaun. Governu simu ona sira-nia konta bankária. Governu la’ós duni sai arbisu ninia povu,” Xefe Governu ne’e hateten hafoin reuniaun semanál ho Prezidente Repúblika (PR), José Ramos Horta iha Palásiu Prezidensiál Bairru Pite, kinta (09 janeiru 2025) ne’e.

Xefe Governu alerta ba família hirak ne’ebé seidauk simu indemnizasaun husi Governu, bele haruka karta direta ba Gabinete atu bele orienta Ministériu relevante hodi haree no responde.

Líder karismátiku ne’e mós husu atu rekolla dadus kompletu kona-ba universitáriu (estudante) sira-ne’ebé mak pertense ba família uma kain 288 ne’ebé hetan despeju administrativu ne’e, hodi aprezenta ba Primeiru-Ministru.

Governu hakarak salva família hirak ne’e tanba konstrui uma iha área ne’ebé mak risku ba dezastre naturál ne’ebé hamosu inundasaun no realidade hatudu katak iha uma lubuk ida mak mota Comoro lori iha 04 Abril 2021 bainhira akontese udan boot durante kalan tomak.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!