DILI, 13 janeiru 2025 (TATOLI)—Ministériu Ensinu Superiór no Siénsia no Kultura (MESSK) liuhusi Diresaun Nasionál ba Legalizasaun konsege legaliza ona diploma hamutuk 19.275 husi estudante ensinu superiór, iha tinan 2024.
“Númeru ne’e kompostu husi feto 11.361 no mane 7.914, estudante husi estranjeiru hamutuk 1.516. Ho nia finalidade lagalizasaun ne’e ho objetivu atu buka serbisu. Feto mak númeru a’as liu,” Diretór Nasionál ba Legalizasaun iha MESSK, Sergio Elídio Borges de Deus, informa iha ninia knaar fatin, Colmera, segunda ne’e.
Atendimentu másimu ne’e loron-rua tanba sei halo prosesu ne’e hotu mak halo verifikasaun.
“Tanba ne’e kada loron ita halo legalizasaun ka atende ema mínimu 372 no másimu liu mak pur ezemplu hanesan iha inísiu janeiru 2024 bainhira Ministériu Edukasaun loke vaga ba profesór sira mak atende ema 700 iha loron-ida,” nia akresenta.
Notísia relavante : ME legaliza diploma 2.162 iha jullu to’o setembru 2024
Kritériu legalizasaun ba ensinu superiór maka estudante tenke aprezenta dokumentu transkrisaun orijinál, dokumentu transkrisaun kopia tahan lima, kartaun estudante tahan ida, fotokopia sertidaun tahan ida no kartaun bilhete de indentidade ka eleitorál ba sira ne’ebé eskola iha rai-li’ur ne’e fotokopia pasaporte tahan ida, no ba sidadaun entrajeiru sira. Depois fotokopia viza husi instituisaun relevante hanesan Servisu Imigrasaun bazeia ba lei imigrasaun nian ne’e tahan ida espesiál ba ema entranjeiru sira.
Jornalista : Osória Marques
Editora : Julia Chatarina