iklan

POLÍTIKA

PN sei hili kandidatu reprezentante PN ba Conselho de Imprensa

PN sei hili kandidatu reprezentante PN ba Conselho de Imprensa

Presidente Parlamentu Nasionál, Maria Fernanda Lay. Imajen Tatoli/Francisco Sony

DILI, 13 janeiru 2024 (TATOLI)—Prezidente Parlamentu Nasionál (PPN), Maria Fernanda Lay, informa Parlamentu Nasionál (PN) sei hili kandidatu reprezentante husi PN ba Conselho de Imprensa (CI) Timor-Leste.

Notísia Relevante: Conselho de Imprensa husu PPN prepara kandidatu reprezentante PN ba CI

“Iha informasaun kona-ba rezultadu eleisaun ba reprezentante órgaun komunikasaun sosiál ne’ebé ita mós presiza indika ita-nia membru,” Prezidente Parlamentu Nasionál (PPN), Maria Fernanda Lay, hato’o liuhusi reuniaun plenária PN, segunda ne’e.

Maske nune’e, líder másimu órgaun soberania daruak ne’e seidauk fó sai kandidatu nia naran no bainhira mak ajenda ba eleisaun iha plenária.

Tanba, tuir Lei Komunikasaun Sosiál, Parlamentu Nasionál tenke hili ema na’in-rua (2) ne’ebé méritu iha komunikasaun sosiál no ema ida nu’udar jurista ne’ebé ninia esperíensia iha área jurídiku nian.

Tuir Lei Komunikasaun Sosiál númeru 5/2014, 19 Novembru, iha artigu 45 kona-ba kompozisaun Conselho de Imprensa hamutuk membru na’in-lima (5), ne’ebé atu hili liuhusi dalan tuir mai:

  1. a) Reprezentante jornalista na’in-rua (2) ne’ebé sira hili tiha ona liuhusi eleisaun;
  2. b) Reprezentante órgaun komunikasaun sosiál ida, ne’ebé órgaun sira hili tiha ona liuhusi eleisaun;
  3. c) Sidadaun na’in-rua (2) ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua (2) ida nu’udar jurista, ne’ebé Parlamentu Nasionál hili;
  4. d) Membru sira Conselho de Imprensa hili entre sira-nia prezidente.

Iha artigu 46 kona-ba mandatu membru CI nian iha durasaun tinan haat (4), ne’ebé sei bele renova dala ida (1) de’it.

Entretantu, liuhusi konferénsia konjuntu parte husi parte asosiasaun jornalista hanesan Timor-Leste Press Union (TLPU), Assosiasaun Jornalista Timor-Leste (AJTL) no Uniaun Profisionál Jornalista Timor-Leste (UPJTL), ne’ebé CI realiza iha tinan kotuk ne’e hili ona reprezentasaun jornalista ba periódu 2025-2029 mak hanesan Joaquim Coutinho no Cesar Mali, no reprezentante mídia-na’in mak Suzana Cardoso.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!