DILI, 13 janeiru 2025 (TATOLI)—Ministériu Obra Públika (MOP) liuhusi Diresaun Nasionál Planeamentu Peskiza no Dezenvolvimentu (DNPPD) provizóriamente simu ona konta bankária husi uma-kain hamutuk 124 iha Fomento II ne’ebé hetan ona despeju administrativa.
“Hafoin Governu liuhusi Sekretaria Estadu Asuntu Toponímia Organizasaun Urbana (SEATOU) halo despeju administrativu ba uma-kain 288 iha Fomento II, to’o agora vítima sira balun hahú mai hatama ona sira-nia dokumentu hanesan eleitorál no konta bankária hodi prosesa pagamentu indemnizasaun,” Tékniku Servisu Reasentementu husi DNPPD, Samuel Dany Soares, informa ba Agência Tatoli, iha ninia knaar fatin, Raikotu, segunda ne’e.
MOP la fó data limitasaun ba uma-kain afetadu sira ne’ebé hakarak hatama dokumentu.
“Ami nafatin hein sira sá loron de’it mak sira mai hatama dokumentu hodi hetan sira-nia direitu,” nia akresenta.
Notísia relevante : Governu responde preokupasaun Deputadu ba despeju administrativu iha Fomentu II
DNPPD hein uma-kain sira hatama hotu dokumentu mak foin halo pagamentu, daudaun ne’e halo hela verifikasaun ba dadus no bainhira loos maka bolu fali afetadu sira halo fali termu aseitasaun mak foin haruka dadus ba Ministériu Finansa (MF).
“MOP haree loos ona mak sei halo pagamentu ba vítima sira. Termu aseita nia objetivu mak afetadu ida halo konkordánsia ho parte Governu, karik halo tiha indemnizasaun mak tempu ruma vítima rasik ka ema seluk ruma mai halo reklmasaun termu aseitasaun ne’e sai prova ida,” nia tenik.
Bainhira selebra ona termu aseisaun, etapa tuir mai maka pagamentu tarde liu semana rua no sedu liu semana ida afetadu sira bele ba haree iha banku maibé daudaun seidauk bele halo pagamentu tanba vítima sira seidauk hatama hotu dokumentu.
Governu sei halo pagamentu bazeia ba tipu uma hahú husi permanente, semi-permanente по temporária. Permanente ne’e ba uma ne’ebé halo ho parede tomak, semi-permanente ba uma ne’ebé feitu ho parede balun de’it, enkuantu temporária ne’e ba barraka sira.
“Ita halo pagamentu ba afetadu sira bazeia ba tipu uma, ne’ebé hahú husi $3.000 ba leten, nune’e husu ba maluk afetadu sira ne’ebé seidauk mai hatama dokumentu karik bele mai tanba ami nafatin hein ita-boot sira,” nia katak.
Afetadu despeju administrativu agradese
Iha fatin hanesan, afetadu despeju administrativu Fomento II, Celeste de Jesus Barreto, agradese ba Governu tanba bele konsidera afetadu sira.
“Ami lahatene bainhira mak osan tama maibé ohin hatama ona dokumentu ne’e sira haruka ami hein de’it, bainhira sira kontaktu mak ami ba check iha banku,” Celeste de Jesus, tenik.
Celeste de Jesus hamutuk ho nia família ne’ebé hetan despeju administrativu iha loron 03 janeiru 2025, daudaun ne’e aluga uma iha Beto.
Nune’e mós, afetadu despeju administrativu Fomento II, Verissimo Monteiro Marçal, lori ona dokumentu no konta bankária ba MOP.
“Ha’u ohin mai ne’e, lori ha’u-nia dokumentu hanesan konta bankária no eleitorál mai ba MOP hodi hetan indeminizasaun,” nia dehan.
Maski nune’e, nia sente triste tanba bazeia ba diálogu ne’ebé komunidade afetadu no ekipa konjunta SEATOU antes ne’e halo iha ponte okos, katak molok atu hasai komunidade sei halo fó uluk indemnizasaun no fó notifikasaun to’o dala-rua mak komunidade la sai, maka notifikasaun ba dala-0tolu ne’e ba hasai kedas.
“Maibé kritéria sira ne’e Governu seidauk halo hotu ba hasai kedas ami, ami sente triste oituan tanba momentu dezastre duni maibé la’ós afeta hotu maibé balun de’it, nune’e husu ba Governu aselera lalais prosesu indemnizasaun ne’e hodi ami bele hola rai ruma hodi halo uma hodi hela,” nia katak.
Jornalista : Arminda Fonseca
Editora : Julia Chatarina
