DILI, 14 janeiru 2025 (TATOLI)–Deputada opozisaun Frente Revolucionária de Timor-Leste Independente (FRETILIN) iha Parlamentu Nasionál (PN), Nurima Riberio Ribeiro Alkatiri, bolu atensaun ba Governu atu garante direitu asesibilidade ba ema ho defisiénsia (EhD) iha Timor-Leste.
“Inisia ho tinan foun nu’udar oportunidade mós hodi haree fali no re-aliña prioridade Estadu ho nesesidade garante direitu no asesibilidade ba ema ho defisíensia sira. Ohin, hakarak bolu atensaun ba kestaun ida fundamentál, dalabarak la fó atensaun, nesesidade garante direitu asesibilidade ba ema ho defisiénsia,” Deputada Nurima, hato’o liuhusi reuniaun plenária iha Parlamentu Nasionál (PN), tersa ne’e.
Tuir Organizasaun Mundiál Saúde (OMS) populasaun mundiál pur volta 15% moris ho tipu ho defisiénsia. Iha Timor-Leste, númeru ne’e bele sai dezafiu relasiona ho limitasaun iha infraestrutura no servisu naton espesializadu disponível, ne’ebé afeta diretamente ba EdH partisipa plenamente iha sosiedade nu’udar sidadaun ho direitu hanesan.
Notísia relevante : ADTL husu instituisaun hotu tenke garante asesibilidade ba ema ho defisiénsia
Ho ida-ne’e, Deputada ne’e bolu atensaun ba parte hotu no Governu hodi prioritiza dezenvolvimentu no provizaun infraestrutura inklui servisu ne’ebé permite asesu ida asesível ba sidadaun moris ho defisiénsia.
“Aleinde ne’e, rampa asesu, falta servisu adekuadu hanesan fisioterapia, apoiu psikolójiku no teknolójia. Importante, infraestrutura públika hanesan eskola, ospitál, edifísiu públiku no transporte, ne’ebé dezeña no adapta ba inkluzivu,” nia akresenta.
Nia konsidera, kestaun ne’e nu’udar direitu báziku no garantidu iha konvensaun internasionál ba EhD, ne’ebé Timor-Leste rasik ratifika ona.
“Bainhira laiha infraestrutura asesível no apoiu espesializadu, maka ema ho defisiénsia barak mak enfrenta limitasaun asesu iha edukasaun, merkadu traballu nomós atu asesu ba dokumentu identifikasaun no dokumentu nesesáriu seluk,” nia tenik.
Reprezentante povu ne’e rekoñese, garante eskola inkluziva no oferese formasaun profisionál la’ós respeita de’it ba direitu ema ho defisiénsia, maibé mós fortalese sosiedade tanba hotu-hotu kontribui ba dezenvolvimentu nasionál.
Vise-Ministru ba asuntu Parlamentár, Adérito Hugo da Costa, agradese ba dadus ne’ebé fó sai no komprometidu sei envia asuntu ne’e ba Ministériu Solidariedade Sosiál no Inkluzaun (MSSI), nune’e iha posibilidade bele iha diskusaun kle’an hodi elabora medida sira hodi bele fó atensaun di’ak liután ba Ehd iha rai-laran.
Jornalista : Nelson de Sousa
Editora : Julia Chatarina