DILI, 14 janeiru 2025 (TATOLI)—Deputadu husi Bankada Governu Congresso Nacional para a Reconstrução de Timor-Leste (CNRT), Gabriel Soares, fó sujestaun ba Ministériu Obra Públika (MOP) aselera konstrusaun ponte Lamara, iha postu Barique, munisípiu Manatuto.
Nia dehan, daudaun tama ona iha tempu udan maibé ponte Lamara ne’ebé kotu ona iha tinan barak nia laran, desde Governu anteriór to’o agora seidauk halo fali konstrusaun foun.“Ponte ne’e utiliza husi komunidade Manatuto hodi fasilita pasajeiru husi munisípiu tolu iha Kosta Kúl no fasilita povu agrikultór lori sira-nia produtu ba fa’an iha merkadu, nune’e sujere ba Governu dala-ida tan atu tau atensaun no se bele halo konstrusaun urjente,” Deputadu hato’o asuntu ne’e durante reuniaun plenária iha Parlamentu Nasionál (PN), tersa ne’e.
Aleinde ne’e, nia husu mós atu halo konstrusaun ba morru protesaun ba mota iha Manatuto hodi proteje agrikultór sira-nia natar.
Notísia relevante : PAM Manatuto submete ona pedidu reabilitasaun ponte Lamara ba MOP
Nune’e mós, Deputadu CNRT, Patrocínio dos Reis Fernandes, levanta preokupasaun kona-ba ponte rua iha Manufahi ne’ebé presiza atensaun.
“Hakarak levanta kona-ba ponte rua iha Manufahi, ne’ebé iha ponte ida iha Abatuo ne’ebé nia konstrusaun ha’u levanta dala-rua ona iha ne’e, maibé to’o agora seidauk iha informasaun ka justifikasaun husi Ministru, razaun saida. Nune’e mós iha ponte ida iha Turuo ne’ebé liga kapitál Same ho Betano, Fatuberliu, Alas no seluk tan, daudaun ne’e iha situasaun grave no presiza urjente atensaun husi Governu hodi bele asegura konetividade ba populasaun,” nia hato’o.
Hatán ba preokupasaun hirak ne’e, Vise-Ministru ba asuntu Parlamentár, Adérito Hugo da Costa, hateten, nia parte sei komunika ba parte MOP hodi tau atensaun sériu ba asuntu ne’e inklui preokupasaun seluk kona-ba infraestrutura hodi bele hetan atensaun.
Antes ne’e, projetu ponte Lamara hein verifikasaun husi Ajénsia Dezenvolvimentu Nasional, Institutu Públiku (ADN, I.P), nune’e hafoin prosesu ne’e maka empreza reponsável bele halo serbisu.
Jornalista : Nelson de Sousa
Editora : Julia Chatarina
