DILI, 15 Janeiru 2025 (TATOLI) – Koordenadór timoroan ba projetu CAFE, Rojer Rafael Soares, subliña, profesór portugés husi Portugál hamutuk 150 ne’ebé mak sei mai hanorin, iha tinan ida-ne’e, iha eskola CAFE iha territóriu laran.
“Ba tinan 2024, ita husu profesór portugés hamutuk 150 ne’ebé mai atu hanorin eskola CAFE iha Timor. Faze dahuluk sira sei to’o iha loron 20 Janeiru ho númeru profesór 94. Faze daruak sei to’o iha Timor iha fulan-Fevereiru nia laran ho totál profesór ne’ebé kompleta iha númeru ne’ebé ita husu”, Koordenadór CAFE, Rojer Rafael Soares, dehan ba Tatoli, iha knaar fatin, Villa-Verde, kuarta ne’e.
Soares hatutan, Ministériu Edukasaun prepara ona hodi simu profesór portugés ne’ebé atu mai hanorin iha eskola CAFE.
“Parte Ministériu Edukasaun nia preparativu simu profesór sira-ne’e, ita preparadu hotu ona 100%, billete mós emite hotu ona no haruka hotu ona ba, nune’e mós otél, rezidénsia ba profesór sira-ne’e to’o sira-nia kontratu prosessu pagamentu enkuantu sira hahú servisu preparadu hotu ona, hein profesór sira mai hodi hanorin de’it”, nia informa.
Nia esplika, profesór sira-ne’e sei koloka ba eskola CAFE iha munisípiu hotu, bazeia ba nesesidade ne’ebé eskola ne’e presiza.
“Profesór sira ne’e sei koloka ba eskola CAFE sira iha territóriu depende ba koordenasaun, depende ba nesesidade husi eskola, se iha munisípiu presiza profesór matéria matemátika ami sei haree profesór ne’ebé mak espesialidade iha área matemátika, ita dezloka ba, nune’e mós ba área sira seluk”, nia dehan.
Aleinde ne’e, profesór portugés sira-ne’e mós fó formasaun komplementár ba profesór timoroan sira ne’ebé hanorin iha eskola CAFE, nune’e iha futuru sira mak sei kontinua hanorin.
“Profesór Portugál mós sei fó formasaun ba profesór timoroan sira, ne’ebé Ministériu Edukasaun rekruta ba eskola CAFE, sira hetan formasaun komplementár husi profesór portugéz sira-ne’e, nune’e sira prepara, tanba projetu ne’e kooperasaun no loron ida sei termina, ne’ebé aban bainrua profesór timoroan sira ne’ebé hetan formasaun ne’e mak fó kontinuidade iha futuru”, nia esplika.
Profesór timoroan hamutuk 347 ne’ebé mak hanorin iha eskola CAFE, iha territóriu no 150 profesór portugés.
Notísia relevante: Portugál kontinua deklara apoiu eskola CAFE iha TL
Jornalista: Osória Marques
Editór : Zezito Silva
