iklan

EKONOMIA, HEADLINE

Progresu diskusaun haruka traballadór timoroan bá Nova Zelándia iha ona 75%

Progresu diskusaun haruka traballadór timoroan bá Nova Zelándia iha ona 75%

Sekretáriu Estadu Formasaun Profisionál no Empregu, Rogério de Araújo Mendonça. Imajen Tatoli/Egas Cristóvão

DILI, 15 janeiru 2025 (TATOLI) – Sekretáriu Estadu Formasaun Profisionál no Empregu (SEFOPE), Rogério Araújo Mendonça, informa katak progresu diskusaun hodi haruka traballadór timoroan bá Nova Zelándia nian atinje ona 75%.

“Mobalidade laborál bá Nova Zelándia iha ona faze 75%, tanba parte Governu Timor-Leste no Nova Zelándia iha ona koordenasaun katak fulan oin [Fevereiru] ekipa husi Nova Zelándia sei dezloka mai Timor-Leste hodi koordena ho Sekretaria Estadu Formasaun Profisionál Empregu no ami mós iha Fevereiru nia rohan sei bá vizita fali Nova Zelándia, signifika ita atu tama ba faze memorandum of understanding (MoU) nian”, Rogério Araújo Mendonça hateten iha Timor Lodge, Dili, ohin.

Nia dehan kritéria bá serbisu iha Nova Zelándia ne’e hanesan mós bá Austrália, Kanadá no Inglaterra, tanba sira-nia padraun serbisu ne’e hanesan.

“Haree ba padraun serbisu hanesan mós bá Austrália mak preparasaun ne’ebé daudaun ita halo hamutuk ho Governu Austrália suporta husi Department of Foreign Affairs and Trade [DFAT] no Ajénsia Internasional Pacific Labour Facility (PLF) apoiu hela kondisaun ne’ebé ita prepara ne’e prienxe hela kondisaun ne’ebé iha Nova Zelándia”, nia dehan.

Númeru traballadór ne’ebé Nova Zelándia presiza iha tinan kotuk ba nasaun sira iha Ázia, inklui Timor-Leste hamutuk rihun 27, maibé prioridade ba Timor-Leste, iha 2025, bele aumenta nia kuotasaun.

Governante ne’e esplika razaun sira hakarak hasa’e númeru traballadór husi Timor-Leste, tanba timoroan sira bá serbisu iha Austrália, Inglaterra no seluk tan hatudu kompartamentu di’ak no badinas hodi fó benefísiu ba empregadór sira.

“Kona-ba área serbisu nian, daudaun ita seidauk bele ko’alia sai tanba seidauk asina akordu ruma, maibé bainhira asina ona mak ita foin hatene”, nia dehan.

Maneira atu serbisu iha Nova Zelándia mak bainhira Governu rua ne’e asina ona MoU, SEFOPE sei loke vaga ba kandidatu sira liuhusi online hanesan halo iha 2023 bá traballadór Austrália nian.

Rekorde katak Embaixadora Timor-Leste ba Nova Zelándia, Idelta Rodrigues, antes ne’e, simu pedidu ida husi Nova Zelándia atu haruka traballadór timoroan sira bá iha ne’ebá, maibé presiza iha diskusaun ho ministériu relevante ba asuntu ne’e.

Tuir diplomata ne’e, Timor-Leste no Nova Zelándia bele implementa programa haruka traballadór, tanba iha esperiénsia haruka timoroan bá serbisu iha Austrália, Koreia Súl no serbisu estajiáriu iha Japaun.

Notísia relevante: SEFOPE koordena ho Governu Nova Zelandia haruka traballadór timoroan serbisu iha nasaun ne’e

Jornalista: Arminda Fonseca

Editora: Maria Auxiliadora

iklan
iklan

Leave a Reply

iklan
error: Content is protected !!