BOBONARO, 16 janeiru 2025 (TATOLI)—Sentru Atendimentu Agrikola Kuda Ulun Bobonaro (CAAKUB, sigla portugés) konsege sosa de’it hare-kulit ho kuantidade tonelada 23 husi grupu agrikultór sira-ne’ebé halo natar uza irrigasaun Maliana I.
Prezidente Sentru Atendimentu Agrikola Kuda Ulun Bobonaro (CAAKUB, sigla portugés) Antonío Barreto, hateten tuir planu iha tinan 2024 asosiasaun ne’e hakarak sosa hare-kulit husi tonelada 150 to’o toneladas 200, maibé la konsege atinje álvu tanba produsaun hare tinan kotuk menús kompara ho tinan hirak liubá.
Notísia Relevante: CAAKUB planeia sosa hare-kulit tonelada 200
“Kuaze grupu no totál agrikultór sira-ne’e ami tama, sira halo hotu natar maibé produsaun mak menús. Tinan ne’e, ami hola tonelada 150 ba leten to’o 200 maibé agora tinan ne’e tonelada 50 de’it la to’o. Ami sosa de’it tonelada 23,454 kilograma. Ninia kauza, ami mós lahtene, tanba ne’e tékniku Agrikultura sira mak hatene liu,” António informa ba jornalista sira iha nia kna’ar fatin, Soso, Maliana, kinta ne’e
Nia dehan, kuantidade hare-kulit ne’e la sufisiente tanba bainhira halo prosesamentu sai foos konserteza sei menus tan, no problema ne’e afeta ba nesesidade merkadu iha Maliana no nasionál.
“Ita hatene ita-nia armajen ne’e nakloke ba konsumidór sira iha Maliana nomós merkadu iha Dili. Tanba ne’e, tonelada 23 ne’e la sufisiente. Ami-nia atividade to’o fulan-outubru de’it para ona, tanba atu dulas hare laiha tan ona. Maibé, ita haree ezijénsia merkadu mós makaas tanba kuaze ema barak mak konsumu foos-rai, maibé sira-nia pedidu mai kuandu laiha ne’e sira mós triste,” nia dehan.
Iha semana kotuk liubá, nia hateten, CAAKUB foin rekolla hare-kulit tonelada neen (6) husi grupu Agrikultór sira iha Halekou, suku Ritabou no planu sei sosa tan to’o tonelada 200 ho presu kada kilograma $0,40 sentavu.
“Ami sei atende lai grupu agrikultór sira-ne’ebé hamahan-aan iha Asosiasaun, maibé la taka dalan ba agrikultór sira seluk ne’ebé hakarak faan. Tanba, Asosiasaun ne’e naran Kuda Ulun signifika agrikultór postu neen (6) ne’e ninian hotu. Sé mak hakarak faan Haré, ami prontu atu sosa,” nia esplika.
Grupu Agrikultór ne’ebé hamahan-aan iha Asosiasaun ne’e hamutuk 23 ho nia membru 300-resin ne’ebé eziste iha suku Ritabou, Raifun, Lahomea, Odomau no suku Holsa.
Notisia Relevante: PA Bobonaro preokupa komunidade halo uma iha natar Maliana
Jornalista : Sergio da Cruz
Editór : Cancio Ximenes