iklan

MUNISÍPIU, VIKEKE

Servisu MAPPF Viqueque planeia konstrui sentru viveiru ikan iha Uatulari

Servisu MAPPF Viqueque planeia konstrui sentru viveiru ikan iha Uatulari

Kondisaun fatin hakiak ikan iha sentru integradu agro-komérsiu Raitahu, iha suku Uma-Uain Kraik, Viqueque, kuarta (27/09/2023). Imajen Tatoli/Vitorino Lopes da Costa

VIQUEQUE, 16 janeiru 2025 (TATOLI)—Diretór Servisu Ministériu Agrikultura, Pekuária, Peska no Floresta (SMAPPF) munisípiu Viqueque, Olivio Soares Freitas, informa servisu MAPPF planeia ona atu halo konstrusaun sentru viveru ikan iha área Edemumu, postu administrativu Uatulari, munisípiu Viqueque.

Notísia Relevante: Eziste sentru viveiru ikan hamutuk 12 iha munisípiu lima

“Ita planeia ona atu halo espansaun sentru viveiru ba ikan oan ne’ebé implementa iha tinan ida-ne’e. Tanba, durante ami sentru viveiru Loihunu la sufisiente fornese ikan oan ba komunidade sira. Nune’e, ho espamsaun ida-ne’e ita bele habarak ikan oan. Fatin ba espansaun sentru viveiru ikan oan, ami identifika atu halo iha Edemumu, atu ita-nia komunidade hakarak haki’ak ikan, karik sira fasil asesu hodi foti ikan oan,” Olivio Soares Freitas hateten ba Agência TATOLI iha nia kna’ar fatin, ohin.

Durante ne’e, nia dehan, sentru viveiru ikan dook iha Loihunu, postu administrativu Ossú, entaun komunidade husi postu Uatualari no Uatucarbau difisil tebes atu foti ikan oan sira iha sentru viveiru refere.

“Tanba ne’e, ita tau sentru viveiru ne’e besik ba ita-nia komunidade iha postu rua ne’e maibé ita la taka dalan mós ba ita-nia komunidade husi Iliomar (Lautém) no Quelicai (Baucau) ne’ebé hakarak haki’ak ikan bele ba direta iha sentru viveiru ikan iha Uatulari,” nia esplika.

Tuir nia, prosesu estabelese sentru viveiru ikan iha área Edemumu ne’e, komunidade iha área refere oferese ona rai ektare ualu (8) ne’ebé Servisu MAPPF Viqueque sei prepara kolan ba ikan oan hamutuk ualu (8), uma ba tékniku sira no fasilidade sira seluk.

“Orsamentu ba establesimentu sentru viveiru ikan, MAPPF prevee ona orsamentu hamutuk milaun $20, ne’ebé daudauk ne’e ita hein prosesu konkursu públiku ba empreza sira. Bainhira iha ona empreza manán na’in, mak to’o iha fulan-dezembru, ita hahú hatama ikan oan ba kolan. Sentru viveiru foun ne’e, sei kontinua tau ikan ho tipu Nila tanba fasil atu distribui.

Tuir dadús, sentru viveiru ikan iha Loihunu ne’ebé lokaliza iha postu administrativu Ossú ho totál kolan hamutuk 12, ne’ebé responde ba munisípiu haat (4) kompostu husi Manatuto, Baucau, Lautém no Viqueque.

Jornalista : Vitorino Lopes da Costa

Editór       : Cancio Ximenes

iklan
iklan

Leave a Reply

iklan
error: Content is protected !!