DILI, 18 marsu 2024 (TATOLI) – Ministériu Agrikultura, Pekuária, Peska no Floresta (MAPPF) konstrui ona sentru viveiru ikan hamutuk 12 iha munisípiu lima ho intensaun atu apoia grupu akuakultór sira.
Diretór Nasionál Akikultura, Fidelino Sousa Marques, informa sentru viveiru 12 ne’e lokaliza iha Same Vila-Manufahi ne’ebé daudaun haki’ak ikan Mas, iha Baucau-Vemasse ne’ebé haki’ak fini ikan Salobra no Marina, depois iha Gleno-Ermera, Mugi-Bobonaro no Viqueque haki’ak ikan Nila.
Ministériu Agrikultura apoiu ona, iha tinan kotuk, verba rihun $345 husi orsamentu retifikativu hodi apoiu sentru viveiru sira atu halo manutensaun ba sentru, inklui sosa hahán no ai-moruk ba ikan sira atu bele dezenvolve aan ho lalais.
“Ita iha sentru viveiru iha Gleno haat, Mugi tolu, Same Vila rua, Vemasse ida no Loihunu rua”, Fidelino Marques relata ba Tatoli iha Comoro.
Ministériu nian planu hodi instala sentru viveiru 12 ne’e ho intensaun atu prepara fini ikan-oan sira hodi bele fornese ba grupu haki’ak-na’in sira. Tanba ne’e, sentru viveiru sira ne’e haki’ak fini tuir ida-idak nia nesesidade.
Notísia relevante: Benefisiáriu 300-resin hetan fundu $49.308 hodi haki’ak ikan
“Ikan sira ne’ebé ita haki’ak ona iha sentru viveiru sira ne’e konsege apoia ona ba grupu hamutuk 21 ne’ebé sai ona benefisiáriu. Espera katak grupu sira ne’ebé hetan ona apoiu fini ikan ne’e kontinua dezenvolve nune’e bele hasa’e rendimentu família nian iha futuru”, nia realsa.
Xefe sentru viveiru ikan iha Ermera, Jorge Quintão, haktuir katak daudaun ne’e sira foku hela ba sentru haat maka diresaun instala ona. Sentru sira ne’e agora hakiak hela fini ikan Nila ne’ebé ninia produsaun distribui ona ba grupu haki’ak-na’in hamutuk tolu iha Ermera.
“Ita apoiu ona fini ba grupu sira iha Ermera atu sira ne’e bele dezenvolve mós sira-nian negósiu hodi hasa’e rendimentu família nian, inklui balun bele uza ba haan hodi hadi’a kondisaun saúde labarik sira”, dehan.
Iha sentru Gleno, iha pesoál hamutuk na’in-15 maka serbisu hodi tau-matan ba sentru viveiru haat ne’e. Jorge Quintão espera katak iha futuru Diresaun Nasionál Akikultura kria tan sentru foun hodi bele aumenta tan pesoál reforsa serbisu hodi tau-matan ba fini ikan sira.
Notísia relevante: Grupu Ilat Atsabe fornese ona ikan ba Programa Merenda Eskolár
Jornalista: Tomé Amado
Editora: Maria Auxiliadora
