DILI, 04 marsu 2024 (TATOLI) – Abitante iha aldeia Haat suku Tiarlelo, postu administrativu Atsabe, iha Ermera, ne’ebé hamahan-aan iha grupu Ilat Atsabe fonese ona ikan kilograma 283 ba eskola bázika haat liuhusi Programa Merenda Eskolár iha 2023.
“Ami sente kontente tanba ami-nian atividade haki’ak ikan ne’e hetan atensaun husi Governu”, xefe grupu Ilat Atsabe, Carlito Gomes, hatete ba Tatoli iha Comoro, ohin.
Nia dehan fornesimentu ikan ba merenda eskolár ne’e tanba koopera ho Ministériu Edukasaun iha tinan kotuk no eskola haat ne’ebé sira kontribui ikan ne’e maka Eskola Bázika Filiál (EBF) Lauhunu. EBF Malabe, EBF Tiarlelo no EBF Batumanu, maibé ba tinan 2024 grupu ne’e seidauk fó tanba programa ne’e seidauk implementa no fini ikan ne’ebé sira simu husi Governu mós tarde, entaun ikan Nila ne’ebé grupu haki’ak ne’e seidauk bele kolleta.
“Ba tinan 2024 nian, ita sei kolleta iha abríl tanba ita simu fini ikan maka tarde, tanba ita-nian Diresaun Nasionál Pekuária foin fornese ikan oan mai ita iha fulan ida ba kotuk”, dehan.
Grupu Ilat Atsabe kontinua hetan, iha tinan ne’e, apoiu husi Ministériu Agrikultura, Pekuária no Floresta hamutuk $3.850. Osan sira ne’e uza hodi konstrui tanke foun haat, inklui halo manutensaun ba tanke rua ne’ebé antes ne’e harii ona iha 2018 no sosa hahán ba ikan sira.
“Osan ita simu ne’e bainhiraezekuta ona sei relata kada fulan tolu ba diresaun relasiona ho progresu serbisu ne’ebé maka ita halo”, realsa.
Prezidente Autoridade Munisípiu Ermera, José Martinho dos Santos, sei halo esforsu atu 2024 ne’e Governu sentrál bele kontinua halo kooperasaun ho grupu haki’ak ikan sira, nune’e nafatin fornese ba eskola sira.
“Ita hakarak osan ho fini ikan ne’ebé Governu apoia ba grupu haki’ak ikan iha Ermera ne’e tenke fó bensefisiu ba sira, liuliu ba estudante sira”, dehan.
Tanba ne’e, nia husu ajuda ba Ministériu Agrikultura atu kontinua koopera ho Ministériu Edukasaun, nune’e bainhira implementa ona Programa Merenda Eskolár ne’e bele hetan mós fornesimentu ikan fresku husi grupu haki’ak ikan sira husi Ermera.
Programa Merenda Eskolár nu’udar subsídiu ne’ebé fó iha ámbitu asaun sosiál eskolár, ne’ebé ho objetivu hodi asegura direitu han loron-loron ho hahán saudável, ekilibrada no indispensável ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulár hodi integra ba rede públika ne’ebé situa iha rai-laran hodi promove ninia prosesu ensinu no aprendizajen.
Notísia relevante: ME tenke monitoriza nafatin implementasaun merenda eskolár
Jornalista: Tomé Amado
Editora: Maria Auxiliadora
