VIQUEQUE, 16 janeiru 2025 (TATOLI)—Diretór Servisu Ministériu Agrikultura, Pekuária, Peska no Floresta (SMAPPF) munisípiu Viqueque, Olivio Soares Freitas, informa iha tina ida-ne’e Servisu MAPPF sei halo reabilitasaun no konstrusaun irrigasaun Uelafua no Futudu, hodi fasilita komunidade halo natar.
Notísia Relevante: MAPPF prevee millaun $5-resin konstrui irrigasaun iha Baucau-Bobonaro-Viqueque
Orsamentu ba konstrusaun irrigasaun rua ne’e liuhusi Diresaun Planeamentu Dezenvolvimentu Integradu munisípiu Viqueque ne’ebé sei jere projetu reabilitasaun ne’e, ho orsamentu ba konstrusaun irrigasaun Uelafua besik millaun $50 no irrigasaun Futudu millaun $20, ne’ebé antes ne’e konstrui uluk ona maibé la konsge finaliza.

“Orsamentu husi munisípiu Viqueque ba tinan 2025 nian, ita sei aloka ba halo reabilitasaun ba irrigasaun rua, irrigasaun Uelafua lokaliza iha postu Lacluta no irrigasaun Futudu ne’ebé lokaliza iha postu administrativu Ossú. Prosesu konkursu públiku la’o ona, depois finaliza ita hahú implementa konstrusaun,” Olivio Soares Freitas hateten ba Agência TATOLI iha nia kna’ar fatin, Beloi, ohin.
Nia dehan, natar parte Uelafua no Futudu kuaze tinan barak sai abandonadu tanba kauza husi irrigasaun aat, maibé ho reabilitasaun ne’e bele fasilita fali agrikultór sira halo hikas sira-nia natar.
“Ha’u fiar katak irrigasaun sira-ne’e ita hadi’a di’ak hotu sei benifisiu ba ita-nia komunidade hodi hasa’e produsun hare. Durante ne’e irrigasaun aat, komunidade la halo sira-nia natar,” nia dehan.
Tuir dadús, natar Uelafua hamutuk ektare 40-resin ne’ebé sei benifísia ba komunidade postu administrativu Lacluta no natar Futudu ektare hamutuk 38 ne’ebé sei benifísia ba komunidade postu administrativu Ossú.
Notísia Relevante: PN aprova proposta OJE 2025 biliaun $2,6 iha finál globál ho votu afavór 42
Jornalista : Vitorino Lopes da Costa
Editór : Cancio Ximenes