TL sai uma-na’in ba konferénsia internasionál ba mudansa klimátika
DILI, 16 janeiru 2025 (TATOLI)—Reprezentante Organizasaun Mundiál Saúde (OMS), Arvind Mathur, kinta ne’e, hasoru malu ho Prezidente Repúblika, José Ramos Horta hodi hato’o katak iha fulan-fevereiru tinan ne’e, Timor-Leste sei sai uma-na’in ba konferénsia internasionál kona-ba mudansa klimátika iha sudeste aziátiku.
“Enkontru ho Prezidente Repúblika atu hato’o katak Timor-Leste (TL) sei sai uma-na’in ba konferénsia internasionál ida-ne’ebé tékniku liu kona-ba Mudansa Klimátika iha Kontinente Ázia no TL sei sai uma-na’in ba konferénsia boot liu ne’ebé sei hala’o iha loron 24-28 fevereiru,” Arvind Mathur hateten ba jornalista sira Palásiu Prezidensiál, Bairro Pité, Dili.
Reprezentante OMS ne’e hato’o ida-ne’e tanba haree husi kompromisu Prezidente no povu TL tomak kona-ba mudansa klimátika.
“Iha biban ne’ebá, ha’u atualiza mós ba Prezidente kona-ba tarefa regulár sira saúde nian ne’ebé hala’o ona, inklui esforsu oinoin ne’ebé halo ona, prosesu halo levantamentu ba moras sira inklui progresu halakon malária iha TL,” nia esplika.
Notísia relevante: Nasaun sira iha mundu diskute kontribuisaun finansiamentu ba mudansa klimátika
Nia hatutan, konferénsia internasionál kona-ba mudansa klimátika ne’e jeralmente sei ko’alia kona-ba prátika pozitiva oinoin ne’ebé hala’o ona hosi nasaun sira seluk, hanesan oinsá hamenus CO2 no atualiza sistema saúde ba mudansa klimátika.
“Konferénsia ne’e sei iha partisipante internasionál liu 70, no ami hein katak sira bele partisipa no fahe prátika sira iha konferénsia ne’e,” Arvind dehan.
Konferénsia internasionál kona-ba mudansa klimátika hanesan enkontru anuál ida-ne’ebé hala’o husi Nasaun Unida (ONU) hodi ko’alia kona-ba mudansa klimátika. Konferénsia ida-ne’e mós koñesidu hanesan konferénsia iha sudeste aziátiku.
Objetivu hosi konferénsia ne’e maka atu fórmula objetivu globál sira hodi rezolve mudansa klimátika. Delegadu sira hosi nasaun oinoin sei diskute nasaun idak-idak nia planu sira hodi kontribui ba objetivu sira-ne’e.
Jornalista: Felicidade Ximenes
Editór: Xisto Freitas da Piedade
