DILI, 08 janeiru 2025 (TATOLI)—Ministériu Saúde (MS) liuhosi Diresaun Nasionál Apoiu Servisu Ospitál, Carlos de Carvalho Guterres, haktuir, durante tinan 2024, Ministériu Saúde transfere ona pasiente hamutuk na’in 347 ba rai-li’ur hodi halo tratamentu saúde.
“Ita haruka ona pasiente sira bá ospitál sira iha rai-li’ur hanesan Indonézia, Malázia no Singapura. Totál pasiente ne’ebé refere bá ospitál sira iha nasaun tolu ne’e hamutuk 347. Husi númeru ne’e, na’in 326 halo ona tratamentu ho susesu no fila ona, enkuantu na’in lima sei kontinua tratamentu iha rai-li’ur no mate na’in 16,” Carlos ba TATOLI, iha nia kna’ar fatin, Caicoli, foin lalais ne’e.
Nia esplika, pasiente na’in lima ne’e, pasiente na’in tolu halo tratamentu iha Malázia no na’in rua iha Indonézia.
Notísia relevante: HNGV sei sosa ekipamentu, objetivu hamenus transferénsia pasiente ba estranjeiru
Nia hatutan, husi pasiente 347 ne’ebé halo referál bá rai-li’ur, iha pasiente 157 bá Malázia, 54 bá Singapura no 136 bá Indonézia.
“Maioria pasiente sira-ne’e sofre moras kardiolojia no kankru, entretantu sira seluk sofre indikasaun neurolójiku,” nia esplika.
Aleinde ne’e, iha tinan 2025, Ministériu Saúde liuhosi Diresaun Nasionál Apoiu Servisu Ospitál planeia atu halo referénsia ba pasiente foun na’in lima hodi halo tratamentu tuirmai iha ospitál estranjeiru sira.
“Tuir planu, iha janeiru nia laran ne’e, sei iha pasiente foun na’in lima ne’ebé sei halo referál ba rai-li’ur. Pasiente sira-ne’e hein de’it aprovasaun husi autoridade sira no sei referál ba ospitál Malázia nian, liuliu sira ne’ebé enfrenta moras kardiolojia no kankru,” nia konklui
Jornalista: Felicidade Ximenes
Editór: Xisto Freitas da Piedade
