2025, DNFPM prepara lista kuantifikasaun ai-moruk hamutuk 396 item
DILI, 17 janeiru 2025 (TATOLI)—Diresaun Nasionál Farmásia Produtu Médiku (DNFPM) husi Ministériu Saúde prepara ona lista kuantifikasaun ai-moruk ba tinan 2025 hamutuk 396 item.
“DNFPM prepara lista kuantifikasaun ida no lista ne’e bazeia ba lista medikamentu nasionál ne’ebé mak regularmente ita uza iha fasilidade saúde sira. Lista foun ne’e purvolta 396 item ba medikamentu de’it ne’ebé mak ita prepara atu submete ba Ministra Saúde iha semana oin atu aprova hodi hato’o ba Institutu Nasionál Farmásia Produtu Medikamentu (INFPM) atubele prosesa iha aprovizionamentu,” Diretór Nasionál Farmásia Produtu Médiku (DNFPM), Delfim da Costa Xavier Ferreira, informa ba TATOLI iha salaun Palácio da Sinzas, Caicoli, Dili, sesta ne’e.
Nia informa, husi ne’e iha mós lista konsumável ne’ebé mak laiha mudansa, nafatin hanesan tinan kotuk no aumenta tan husi programa balun foun ne’ebé mak atu kompleta de’it hanesan programa dentál nian no mós matan nian.
Notísia relevante: http://2024, INFPM sosa medikamentu item 2.330 iha rai-li’ur
“Medikamentu ne’e hotu-hotu ba kategoria ba vitál, esensiál no nesesáriu inklui lista koletiva. Klaru katak ita sei fó ba INFPM atu uza hodi kompra iha tinan ida-ne’e,” nia relata.
Nia esplika, ai-moruk sira-ne’e iha nível utilizasaun hanesan iha ospitál sira iha lista própria, iha sentru saúde iha lista própria. Ezemplu, ospitál iha 200 item resin, sentru saúde sira iha 182 item ne’ebé mak sira-nia lista durante ne’e iha.
Notísia relevante: Ai-moruk “stock out”: Governu aloka millaun $8 ba INFPM atu sosa ai-moruk
Iha sorin seluk, Diretór Aprovizionamentu Institutu Nasionál Produtu Médiku no Farmaseútiku (INFPM), Mariano da Silva Marques, hateten katak husi janeiru to’o dezembru 2024, INFPM konsege sosa ai-moruk hamutuk 2.330 husi rai-li’ur liuhosi empreza lokál no internasionál sira.
Jornalista: Felicidade Ximenes
Editór: Xisto Freitas da Piedade
