BOBONARO, 17 janeiru 2025 (TATOLI)—Diretór Servisu Edukasaun Munisípiu Bobonaro, Miguel Freitas, hateten Programa Merenda Eskolar (PME) tinan letivu 2025 to’o ágora seidauk implementa tanba relatóriu mensál dadus matrikulasaun 2025 husi eskola sira seidauk kompletu.
Orsamentu Jerál Estadu 2025 alokadu no prontu ona atu distribui ba iha eskola Ensinu Báziku Sentrál (EBC, sigla portugés) hamutuk 23 no EBC filiál 140-resin inklui eskola privadu tolu (3) ne’ebé eziste iha Bobonaro.
Notísia Relevante: Edukasaun Bobonaro deteta erru barak iha implementasaun programa merenda eskolár
“Ami hein hela relatóriu mensál ne’ebé mak husi eskola ida-idak to’o oras ne’e seidauk kompletu ne’e mak ezekusaun Programa Merenda Eskolár ne’e seidauk implementa. Agora, dadus sira-ne’e ami hato’o fila-fila ona maibé to’o ikus sei iha eskola neen (6) ou hitu (7) hanesan mak seidauk lori mai ne’e mak implementasaun atraza. Agora, ha’u sei kontaktu liuhusi telefónika para segunda semana ne’e bele submete hotu ona,” Nia informa ba jornalista sira iha nia kna’ar fatin, sesta ne’e
Tuir orientasaun husi Governu, nia dehan, eskola hotu-hotu iha direitu atu asesu Programa Merenda Eskolármaibé to’o agora eskola privadu barak mak seidauk submete sira-nia dadus kompletu ne’e.
“Eskola privadu tolu asesu ona, agora eskola Ailok-laran tama tan tanba sira-nia dadus mós preparadu ne’ebé hein de’it atu implementa. Eskola sira seluk, ami husu sira-nia dadus to’o agora seidauk lori mai,” nia dehan.
Reprezentante estudante nia inan-aman, Maria de Jesús Moniz, husu diresaun Servisu Edukasaun Munisipál atu aselera prosesu implementa Programa Merenda Eskolár (PME), tanba estudante sira hahú ona eskola no ensinu aprendizajen la’o normal ona.
“Ami-nia oan sira presiza han, tanba sira fila mai dehan iha eskola sira la han tanba ema la tein. Maibé, laiha buat ida, tanba ita la’o ho Sistema. Ita espera, iha tempu badak ne’e programa la’o fali ona. Tanba, se hansan beibeik, labarik sira nia direitu loron hira ne’e lakon,” nia hateten.
Programa Merenda Eskolár nu’udar subsídiu neʼebé fó iha ámbitu asaun sosiál eskolár, ho objetivu atu asegura direitu han loro-loron ho hahán saudavél, ekilibrada indispensavél ba dezenvolvimentu no no insentiva partisipasaun labarik sira iha edukasaun pré-eskola no iha ensinu báziku, públiku no partikulár hodi integra ba rede públika ne’ebé situa iha rai-laran hodi promove ninia prosesu ensinu aprendizajen.
Orsamentu tinan 2025 ne’ebé governu aloka ba munisípiu Bobonaro hodi implementa Programa Merenda Eskolár ne’e hamutuk milaun $2-resin.
RAntes ne’e, iha tinan 2024, Autoridade Munisípiu Bobonaro aloka orsamentu ba merenda eskolár ho montante $1,531.786,84 ne’ebé ezekuta ba loron efetivu 191.
Orsamentu ne’e fahe ba Enisnu Pre-eskolár hamutuk $130,519,00 ho totál estudante hamutuk 2,283 no Enisnu Báziku ho montante osan $1,401.267,84 ho totál estudante hamutuk 24,532.
Notísia Relevante: DSME Bobonaro hein eskola privada submete dadus atu asesu PMA
Jornalista : Sergio da Cruz
Editór : Cancio Ximenes