BOBONARO, 02 abríl 2024 (TATOLI) – Diresaun Servisu Munisipál Edukasaun (DSME), Autoridade Munisípiu Bobonaro, kontinua hein ensinu báziku privada sira submete dadus estudante atu asesu Programa Merenda Eskolár (PME) tinan letivu 2024.
Diretór Servisu Munisipál Edukasaun, munisípiu Bobonaro, Miguel Freitas, informa, iha fulan hirak liubá Servisu Munisipál Edukasaun, fahe ona informasaun ba eskola privadu sira iha munisípiu Bobonaro tomak atu submete dadus, maibé to’o agora foin eskola tolu hanesan Koléjiu Infante Sagres Maliana, eskola Espírito Santo Ailok-laran Atabae no eskola Hauba.
Notísia relevante: EJP 33 selebra kontratu ho PAM Bobonaro ezekuta merenda eskolár
“Ita hein eskola privadu sira ne’e atu hatama dadus, maibé to’o agora seidauk, agora ami tau konsiderasaun ba eskola tolu ne’e de’it, maibé dadus sira-ne’e seidauk tama hotu, entaun sira-ne’e sei pending hela, agora implementa ba eskola públiku, ami mós sei esforsu sira-nia dadus bele tama, nune’e sira-ne’e mos iha loron ikus mai sei tama hotu, tanba orsamentu ne’e alokadu mós ba sira hotu,” nia informa ba jornalista sira iha Maliana, segunda ne’e.
Dirigente Servisu Munisipál Edukasaun, Munisípiu Bobonaro ne’e dehan, to’o agora seidauk iha data fiksu atu implementa Programa referida, tanba parseiru Word Food Programme (WFP) halo hela distribuisaun foos fortifikadu iha postu administrativu Maliana no sei kontinua ba postu administrativu lima seluk.
“Sira distribui hotu tiha mak ami hein orientasaun hosi superiór sira atu implementa iha data hanesan,” nia katak.
Nia apela ba Ekipa Jestaun Programa (EJP) sira iha eskola hotu-hotu atu prepara-aan hodi implementa programa ne’e ho responsablidade tuir madalan ne’ebé iha ona.
Nia mós husu ba fornesedór sira atu sosa grupu ai-han lokál ne’ebé grupu agrikultór sira kuda ka prodús.
“Sé imi iha difukuldade liga ho sira, nune’e sira mak bele fornese fehuk, talas, ai-farina, imi mak kria ligasaun atu nune’e servisu ne’e fasil,”Tenik Dirijetente Servisu Munisipál edukasaun Bobonaro
Enkuantu totál orsamentu ne’ebé governu sentrál aloka mai Autoridade Munisipál Bobonaro atu implementa programa ne’e hamutuk millaun ida-resin ($1,538.56) ba totál estudante rihun 27-resin ho totál loron efetivu 191.
Notísia relevante: Grupu Ilat Atsabe fornese ona ikan ba Programa Merenda Eskolár
Jornalista: Sérgio da Cruz
Editór: Evaristo Soares Martins
