DILI, 17 Janeiru 2025 (TATOLI) – Ekipa interministeriál ne’ebé lidera husi Sekretaria Estadu Asuntu Toponímia no Organizasaun Urbana (SEATOU) apoia ona uma-kain 72 ne’ebé afetadu ba despeju administrativa iha Bebonuk hodi lori sira fila bá idaidak nia munisípiu.
Komunidade afetada ba despeju administrativu sira ne’e mai husi Rejiaun Administrativa Espesiál Oé-Cusse Ambeno (RAEOA), Viqueque, Ermera no seluk tan.

Komandante Operasaun Autoridade Protesaun Sivíl (APC, sigla portugés) munisípiu Dili, Cláudio da Silva, hateten uma-kain afetada ba despeju administrativa iha Bebonuk ne’ebé Governu haruka bá Kuarentena (no hela durante loron tolu, husi kuarta to’o sesta-feira ne’e) ho totál membru família hamtuk 300 husi uma-kain 72.
“Uma-kain afetada ba despeju administrativu iha Bebonuk ne’ebé koloka mai iha ne’e ohin tenke husik fatin ida ne’e. Idaidak fila bá nia munisípiu, inklui Rejiaun Administrativa Espesiál Oé-Cusse Ambeno”, Cláudio da Silva dehan ba Tatoli, iha Tasi-Tolu, ohin.
Komandante ne’e salienta katak Ministériu Solidaridade Sosiál no Inkluzasaun (MSSI) mós apoia nesesidade bázika ba Autoridade Protesaun Sivíl (APC, sigla portugés) hodi distribui ba komunidade. Nesesidade bázika sira ne’e mak hanesan foos, mina, biti no seluk tan.

Prezidente Autoridade Portuária Timor-Leste, Institutu Públiku (APORTIL, I.P), José de Oliveira Leong, hateten APORTIL fasilita, uma-kain haat fila ona bá Oé-Cusse.
“Komunidade ne’ebé halo viajen bá Ataúro no RAEOA, tuir regra, tenke selu ka hola billete mak bá, maibé ohin ne’e polítika Governu nian, ba oin pagamentu halo oinsá ne’e hein desizaun husi Governu, importante mak ita fasilita uluk sira bá”, dehan.
Vítima despeju administrativu husi Oé-Cusse, Natália Soares, hateten Governu apoia ona nesesidade bázika ba sira no tenke husik ona fatin Kuarentena, Tasi-Tolu.
“Ami tenke sai, ohin, ona husi fatin ne’e, tanba iha ne’e labele liu oras 72. Ami-nia sasán prepara ona, agora ami bá. Agradese tanba Governu fó nesesidade bázika ba ami”, nia realsa.
Antes ne’e, Governu apoia ona transporte ba komunidade afetada ba despeju administrativu iha Fomentu II-Comoro hamutuk uma-kain 288 hodi fila bá idaidak nia munisípiu orijen.
Notísia relevante: Xefe suku Comoro: Governu transporta ona família uma-kain 288 ba munisípiu
Jornalista: Arminda Fonseca
Editora: Maria Auxiliadora