DILI, 11 janeiru 2025 (TATOLI)–Xefe suku Comoro, Eligio José da Silva Marçal, hateten, Governu transporta ona komunidade afetadu Fomentu II Comoro hamutuk uma kain 288 ne’ebé hetan Despeju Administrativu iha 03 janeiru 2025 ne’e ba sira ida-idak nia munisipiu.
Komunidade afetadu sira-ne’e, Governu Konstitusionál da-sia (IV) fasilita no transporta ona ba ida-idak nia munisípiu oríjin iha kuarta (08 janeiru 2025) ne’e.
Notísia Relevante: PM Xanana: Komunidade ne’ebé hetan eviksaun iha direitu hetan indemnizasaun
“Totál família ba munisipiu hamutuk 50, balun ba Baucau no munisipiu sira seluk, maibé maioria fila-fali ba munisípiu Ermera,” xefe suku hato’o ba Tatoli iha Fomentu I.
Autoridades lokal ne’e informa, komunidade iha Fomentu II hetan nanis ona notifikasaun iha tinan 2024 husi Governu Konstitusionál da-sia (IX) atu hamamuk fatin.
Entretantu, nia relata, família uma kain hamutuk 92 iha Fomentu I mak sei hamamuk fatin no husi númeru ne’e uma kain 62 mak hakarak atu fila-fali ba sira-nia munisipiu hanesan Bobonaro, Ermera no Liquiça.
Sekretariu Estadu Asuntu Toponímia no Organizasaun Urbana (SEATOU), Germano Santa Brites Dias, hateten Governu disponibiliza kamioneta no mina ba sira ho karreta privadu hodi tula ba ida-idak nia munisipiu.
“Governu sentrál atu apoiou sira ne’ebé hakarak diretamente ba munisipiu sira maioria ba Aileu, Baucau, Bobonaro, Covalima no Viqueque,” governante ne’e hateten.
Nia hateten, Governu liu husi Autoridade Protesaun Sivil hodi fornese ai-han durante loron ne’ebé sira hela provizória iha Karantina Tasi-Tolu.
Tuir nia, populasaun sira ne’ebé iha karreta privadu, Governu prepara mina hodi enxe ba sira-nia karreta atu sira bele tula fila ema no sasán ba sira-nia munisipiu.
Antes ne’e, tuir nota ne’ebé TATOLI asesu, kuarta (08 janeiru 2025) ne’e, Primeiru-Ministru (PM), Kay Rala Xanana Gusmão tun direta iha terrenu hodi fó orientasaun no apoia Ministru Obra Públikas (MOP), Samuel Marçal ho Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias hodi fasilita família uma-ka’in 288 ne’ebé konstrui uma iha área risku dezastre natural liuliu iha mota Comoro ninin área Fomentu II, ba ida-idak nia munisípiu.
Família uma kain 288 ne’e, Governu fasilita no transporta to’o iha ida-idak nia munisípiu inklui komunidade ne’ebé mai husi Rejiaun Administrativa Espesiál Oé-cusse Ambeno (RAEOA).
Jornalista : Jesuína Xavier
Editór : Cancio Ximenes
