iklan

HEADLINE, POLÍTIKA

Lurdes Bessa aprezenta progresu serbisu ba PR hafoin termina mandatu 

Lurdes Bessa aprezenta progresu serbisu ba PR hafoin termina mandatu 

Embaixadora Timor-Leste ba Zenebra, Lurdes Bessa. Foto/Francisco Sony

DILI, 17 Janeiru 2025 (TATOLI) – Embaixadora Timor-Leste ba Zenebra, Lurdes Bessa, hasoru malu ho Prezidente Repúblika (PR), José Ramos Horta, hodi aprezenta progresu serbisu durante tinan tolu asume pasta hanesan embaixadora.

“Ohin ha’u mai hasoru Prezidente Repúblika, tanba ha’u foin fila husi Zenebra hala’o misaun nu’udar Emabaixadora Timor-Leste nian ba Zenebra, ne’ebé ramata ona iha 31 Dezembru 2024”, Lurdes Bessa hateten iha Palásiu Prezidensiál, Bairru Pité, Dili, ohin.

Nia hato’o progresu serbisu sira durante tinan tolu mak halo koordenasaun serbisu ho Ministériu Negósiu Estranjeiru no Kooperasun (MNEK), Prezidénsia Repúblika, Governu no iha área multilaterál mak konsege lori Timor-Leste adere ba Organizasaun Mundiál Komérsiu (OMK) iha 31 Agostu 2024.

“Progresu serbisu seluk ita mós iha partisipasaun konstante permanente iha Konsellu Direitu Umanu iha Zenebra ho kontestu mundiál, ne’ebé komplikadu hanesam funu akontese iha parte hotu-hotu, ita konsege fó duni ita-nia parseiru ho intervensaun sira iha ne’ebá”, nia dehan.

Embaixadora Timor-Leste ba Zenebra, Lurdes Bessa. Foto/Francisco Sony

Hanesan diplomata Timor-Leste nian iha Zenebra halo mós kooperasaun ho país sira seluk, ne’ebé iha tinan kotuk konvida Xefe Estadu bá Suisa hodi partisipa mós simeira pás nian kona-ba funu iha Ukránia.

“Ita mós organiza eventu ida ho Governu Suisa kona-ba ezemplu ne’ebé Timor-Leste fó ba rezolusaun konflitu, liuhusi dalan pás ho diálogu. Ita fahe ita-nia esperiénsia ba país sira seluk liuhusi g7+ no buat barak ne’ebé ita alkansa durante tinan tolu iha ne’ebá no ba oin sei kontinua, tanba Zenebra importante tebes ba multilaterál”, Lurdes Bessa akresenta.

Nia salienta maske mandatu mak ramata ona, maibé Timor-Leste nia kooperasaun ho país sira seluk kontinua. “Kona-ba OMK ita sai membru ona, maibé agora ne’e ita-nia serbisu buka dalan oinsá mak ho adezaun ida ne’e ita mós bele dezenvolve ita-nia ekonomia rai-laran no bele esporta bá rai-li’ur”, realsa.

Rekorde katak Embaixadora Lurdes Bessa simu pose, iha 13 Agostu 2021, husi Prezidente Repúblika, Francisco Guterres ‘Lú Olo’, hodi reprezenta Timor-Leste iha Suisa.

Lurdes Bessa antes ne’e hala’o mós knaar nu’udar deputada, prezide bankada partidu nian iha Parlamentu Nasionál, sai membru Governu ho responsabilidade ba edukasaun no hanesan mós asesora ba Prezidente Repúblika.

Notísia relevante: PM Xanana hala’o enkontru ho Embaixadora Lurdes no Kónsul Onoráriu Zenebra

Jornalista: Arminda Fonseca

Editora: Maria Auxiliadora

iklan
iklan

Leave a Reply

iklan
error: Content is protected !!