DILI, 17 janeiru 2024 (TATOLI)–Primeiru-Ministru (PM), Kay Rala Xanana Gusmão ho ninia ekipa to’o ona iha Suiça iha tersa (16/01) no halo kedan enkontru ho Embaixadora Timor-Leste iha Zenebra, Lurdes Bessa no ekipa.
Xefe Governu ho delegasaun desloka hosi Dili iha segunda (15/01) bá Bali, liu bá Dubai to’o Aeroportu Internasionál Suiça iha 07:30 dadeersan iha loron tuir mai, ne’ebé simu direta hosi Embaixadora Lurdes no protokolu hodi kontinua viajen ba Otél Valbella Resort ne’ebé dook malu ho fatin enkontru Davos-Klosters, ho distánsia kilómetru 40, ho tempu viajen oras ida.
To’o iha otél, PM Xanana kontinua realiza reuniaun badak ho Embaixadora Lurdes Bessa hodi atualiza ajenda enkontru Fórum Ekonómiku Mundiál (World Economic Forum) ba dala-54 iha Davos-Klosters, ne’ebé sei akontese iha loron 15 to’o 19 2024.
Biban ne’e, Diplomata timor-oan ne’e agradese tebes ba vizita Xefe Governu hodi hametin kooperasaun Timor-Leste ho parseiru sira iha fórum mundiál.
Notísia relevante : PM Xanana aranka ohin bá Suiça partisipa fórum ekonómiku mundiál
Aleinde ne’e, PM Xanana akompaña hosi Embaixadora Lurdes Bessa hala’o mós reniaun kortezia ho Kónsul Onoráriu Timor-Leste ba Alemaña, Uta Lena Lenzen hodi atualiza progresu kooperasaun serbisu rai rua ne’ebé estabelese durante ne’e no haree kontinua programa ne’ebé sei hala’o e iha tempu tuir mai.
Durante enkontru, Kónsul Onoráriu Uta Lena Lenzen aprezenta konvite hosi Governu Alemaña, ne’ebé konvida Xefe Governu hala’o vizita ofisiál bá Alemaña iha tinan ne’e nia laran.
Asuntu seluk, Kónsul Uta Lena Lenzen hato’o katak nia parte atu lori intelektuál na’in-lima ne’ebé koñesidu iha Europa no simu ona Prémiu oin-oin atu hala’o vizita bá Timor-Leste no hala’o enkontru ho entidade, sosiedade no estudante universitáriu sira inklui vizita munisípiu balun iha Timor-Leste.
Kónsul Uta Lena aprezenta mós ba Prezidente Repúblika, José Ramos Horta durante ninia vizita bá Timor-Leste.
Iha parte lorokraik, PM Xanana akompaña hosi Embaixadora Lurdes Bessa partisipa jantar amizade no benvindu hosi Klaus no Hilde Schwab hamutuk ho Xefe Estadu no Xefe Governu sira, organizasaun internasionál, inklui partisipante Fórum Ekonómiku Mundiál.
Tuir ajenda iha kuarta (17/01) dadeer to’o lorokraik, Xanana hamutuk ho Xefe Governu no Xefe Estadu ASEAN nian balun sei partisipa abertura Fórum Ekonómiku Mundiál iha sidade Davos-Klosters ne’ebé ho kondisaun klima malirin ho jelu.
Xefe Governu Xanana sei hato’o mós palestra ba parseiru sira liga ho temátika haat ne’ebé deside ona.
Tuir ajenda, Forum Ekonómiku Mundiál ne’e sei partisipa direita hosi líder mundiál sira hanesan Sekretáriu Jerál Nasaun Unida (ONU), António Guterres, Primeiru-Ministru Kambódia, Hum Manet, Prezidente Repúblika Singapura, Tharman Shanmugaratnam, Prezidente World Bank Group, Ajay S Banga, Primeiru-Ministru Bulgaria, Nikolai Denkov, Diretór Jerál WHO, Tedros Ghebreyesus no bainaka importante sira seluk ne’ebé sei hato’o hanoin di’ak sira atu bele serbisu hamutuk iha prioridade temátika haat ne’ebé sei deskute durante fórum.
(TATOLI)
