iklan

MUNISÍPIU, VIKEKE

PAM Viqueque entrega “hand tractor”-tratór boot 30 ba administradór postu sira

PAM Viqueque entrega “hand tractor”-tratór boot 30 ba administradór postu sira

Prezidente Autoridade Munisípiu (PAM) Viqueque, Francisco C.S de Gonzaga Soares, entrega Hand Tractor no tratór boot hamutuk 30 ba administradór postu lima, sesta (17 janeiru 2025). Imajen TATOLI/Vitorino Lopes da Costa.

VIQUEQUE, 17 janeiru 2025 (TATOLI)—Prezidente Autoridade Munisípiu (PAM) Viqueque, Francisco C.S de Gonzaga Soares, sesta ne’e, entrega Hand Tractor no tratór boot hamutuk 30 ba administradór postu lima, atu fasilita agrikultór sira hala’i natar no hasa’e produsaun iha rai-laran.

Notísia Relevante: OJE 2025: MAPPF sei sosa “hand tractor” 300 no mákina kuda hare

“Ohin, ha’u distribui hand tractor no tratór boot ne’ebé foin lalais Governu sentrál distribui ba munisípiu Viqueque, ne’ebé ekipamentu sira-ne’e ita la fó ba ema ruma no grupu sira. Maibé, ita deside distribui ba kada postu sira, depois administradór sira kontrola no jere ekipamentu sira-ne’e no ita-nia agrikultór sira fasil asesu hodi hasa’e produsaun,” PAM Viqueque ne’e hateten ba jornalista sira, iha nia kna’ar fatin, ohin.

Kolokasaun ekipamentu sira ba postu sira-ne’e, nia dehan, atu agrikultór sira tenke book-aan halo toos no natar tanba ekipamentu ne’ebé distribui ba kada postu administradór sira-ne’e sei fasilita agrikultór sira atu uza.

Se agrikultór presiza fini ne’e, Governu sei fó ba agrikultór sira hodi motiva sira, maibé bainhira presiza tékniku halo manutensaun ba tratór sira-ne’e mak Governu apoia sira.

“Tanba ne’e mak ha’u lakohi fó ekipamentu sira-ne’e ba ema individu sira, presiza ekipamentu halo pedidu ba adiministradór, depois apoia ekipamentu ba ajuda fila rai,” nia dehan.

Nia dehan, hand tractor ne’e administradór postu mak sei halo manutesaun no manutensaun ba tratór boot ne’e parte munisípiu mak responde 75% no postu responde 25%, nune’e munisípiu no postu mak serbisu hamutuk hodi kontrola.

Diretór Servisu Agrikultór Munisípiu Viqueque, Olivio Soares Freitas, haktuir iha 2024 ne’e munisípiu simu hand tractor hamutuk 30 no tratór boot unidade neen (6), no ekipamentu agrikula sira-ne’e kompetensia PAM ne’ebé deside la distribu ba grupu no individu maibé koloka ba iha postu, depois agrikultór sira presiza mak ba apoia sira.

“Ekipamentu sira-ne’e distribui hotu ba postu, depois mak ami ho PAM mak halo monitorizasaun ba atividade sira-ne’ebé sei implementa iha kada postu. Espera ho kolokasaun ekipamentu sira ba tinan ida-ne’e, ita bele hasa’e produsaun agrikula iha munisípiu Viqueque,” nia dehan.

Administradór postu Lacluta, Pascoal Gama, hateten postu Lacluta simu hand tractor lima (5) no  tratór boot ida (1), ne’ebé ho apoiu sira-ne’e bele ajuda komunidade agrikultór sira iha postu Lacluta.

“Ohin, ami simu hand tractor no tratór boot husi munisípiu. Ho apoiu sira-ne’e, ha’u sente ita bele apoiu ona ita-nia agrikultór sira natar halai natar. Kona-ba jere ekipamentu sira-ne’e, agora ami sei prepara fatin hotu, ami sei prepara komisaun ida hodi tau matan ba ekipamentu. Depois ami sei halo enkontru ba kada suku sira hodi informa ekipamentu sira-ne’e ba ita-nia komunidade, katak ita iha tratór kiik lima no boot ida maibé ita la fahe ba komunidade. Ita sei tau iha postu, depois mak komunidade hatama pedidu mak ba fila komunidade nia natar ka toos,” nia hateten.

Tanba, nia dehan, uluk distribui tratór ba grupu iha ema balun de’it mak sai benefisiáriu, maibé agora autoridade mak jere hodi povu bele sai benifisiáriu ba ekipamentu sira-ne’e.

Tuir dadús, hand tractor hamutuk 30 no tratór boot neen (6) no husi númeru ne’e koloka ba postu Uatucarbau hand tractor lima (5) no tratór boot ida (1), Uatulari simu hand tractor lima (5) no tratór boot ida (1), Uatucarbau simu hand tractor lima (5) no tratór boot ida (1), Ossú simu hand tractor hitu (5) no tratór boot ida (1), no postu Viqueque-vila no Lacluta simu hand tratór lima (5) no tratór boot ida (1).

Jornalista : Vitorino Lopes da Costa

Editór       : Cancio Ximenes

iklan
iklan

Leave a Reply

iklan
error: Content is protected !!