COVALIMA, 17 janeiru 2025 (TATOLI) – Veteranu Covalima husi zona hitu kontinua organiza malu hodi fó sai erru balun ne’ebé veteranu sira identifika iha publikasaun lista editál naran ba konsellu Kombatente Libertasaun Nasionál (KLN).
Porta vóz veteranu Covalima, Manuel Barboja Pina “Mameran” fó sai, erru ne’ebé sira identifika mak hanesan, partipasaun luta la tuir deklarasaun ne’ebé deklarante sira hato’o ba komisaun verfikasaun dadus, komisaun verfikasaun halo manipulasaun dadus hodi haree liu ba família no kór polítika, sobrevivénsia sira la hetan direitu ba pensaun no membru klandestina nia partipasuan luta boot liu nia responsavel sira.
“Ho erru ne’ebé ami identifika, ami hato’o ba Ministru Asuntu Kombatente libertasaun nasionál no Prezidente Konsellu Libertasaun Nasionál presiza fó atensaun másima hodi halo auditória investigasaun ba komisaun verifikasaun,” Manuel Barboja Pina “Mameran hateten, liuhusi konferénsia imperénsia, iha edifísiu KKL Covalima,Tabakolot, ohin.
Tan ne’e veteranu Covalima ezije presiza atu reverifika fali lista editál ne’ebé rejista iha 2009, presiza haree mós fixa tuir pesoál ida-idak nia durasaun partisipasaun luta no deklarasaun ne’ebé sira hato’o ba komisaun verfikasaun hodi halo komparasaun.
Nune’e husu ba Ministru Asuntu Kombatente Libertasaun Nasionál atu labele uza asesór husi estranjeiru nune’e la intende situasaun luta povu hodi kria lei ne’ebé la fó benefísiu ba veteranu sira tanba bazeia lei ne’ebé vigora tanba sobrevivensia ne’ebé mate iha ai-laran nia família labele simu nia pensaun
Veteranu Covalima mós konsidera estrutura Konsellu Kombatente Libertasaun Covalima hamosu nepotizmu iha prosesu verfikasaun daruak rejista dadus veteranu 2009 no presiza atu demite estrutura Konsellu munisipál liuhusi kongresu munisipál.
“Ami husi Ministru Asuntu konsellu Kombatente Libertasaun Nasionál atu konsidera ami-nia ejizensia nune’e bele hadia atendementu ba veteranu sira ho onestu no transparánsia nune’e ministériu presiza atu konsidera,” nia dehan.
Komisáriu –Membru Konsellu Kombatente Libertasaun Nasionál, Francisco Doutel “Sarmento Lamesak” klarifika, nia parte la hatene aprovosaun lista editál ba ema ne’ebé merese pasa ba 8 a 18 no merese ba 4 a 7.
“La’o ha’u mak halo validasaun dadus lista editál naran ba konsellu Kombatente Libertasaun Nasionál, ida-ne’e servisu husi Ministériu Asuntu Kombatente Libertasaun Nasionál no sira mak halo validasaun mak ohin loron ita-boot sira organiza malu hodi halo protesta. Tuir loloos ami mak halo validasaun,” nia esplika
Nune’e Lamesak rekomenda atu hakalma situasaun ne’e, sei halo reuniaun ho estrutura sira tanba daudaun ne’e atu buka solusaun formuláriu preparadu ona hafoin finaliza reuniaun mak submete karta ba Ministériu no Prezidente Konsellu Kombatente Libertasaun Nasionál.
“Ha’u hakarak imi hotu pasa ba 8 a 14 ema la haree imi-nia fixa no imi-nia fixa tau iha ne’ebé ha’u la hatene no prosesu atu halo validasaun ami la hatene. Maibé, ha’u nafatin responzabilidade, ha’u sei hato’o imi-nia hanoin, presiza atu hakalma situasaun,” nia garante.
Sekretáriu Ezekutivu Konsellu Munisipál Kombatente Libertasaun Covalima, Manuel Henrique “Fitun” reforsa, Komisáriu halo ona esplikasaun tan segunda semana oin sei konvoka enkontru hafoin foti formuláriu no oinsá atu priense formatu.
“Ita daudaun ne’e prepara ona formasaun reklamasaun hanesan ita-boot sira haree mak ema balun nia naran la merese atu sai 8 a 14 hakerek iha formasaun no se mak merese atu hetan menus A 3 no matebian mate la’ós tanba funu prense formatu no presiza iha sasin,” nia dehan.
Notísia relevante:Veteranu Covalima halo asaun protestu hodi kontesta aprovasaun lista KLN
Jornalista: Celestina Teles
Editór :Rafael Ximenes d A. Belo
