DILI, 20 janeiru 2025 (TATOLI)—Hahú husi loron 13-20 janeiru tinan ne’e, Autoridade Protesaun Sivíl (APC-sigla portugés) rejista kazu dezastre naturál hamutuk 27 iha Timor-Leste (TL).
“Ema ne’ebé afetadu ba dezastre naturál kompostu husi bee sa’e, ahi han uma, anin boot no rai halai hamutuk 27,” Xefe Seksaun Komunikasaun Relasaun Esterna Autoridade Protesaun Sivíl, Nelson Nunes Orleans informa ba jornalista sira liuhusi konferénsia imprensa iha salaun APC, Caicoli, Dili, segunda ne’e.
Nia hateten, iha munisípiu Aileu rai lakan fera ema na’in ida, munisípiu Baucau ahi han uma ida, munisípiu Dili ahi han uma ida no mós anin sobu uma ida, Ermera anin sobu uma ida, Manufahi anin sobu uma ida, Viqueque mota lori ema ida.
“Komandu APC hamutuk ho ita-nia parseiru fornese ona asisténsia hanesan ai-han no apoiu sira seluk ba família afetadu sira,” Nelson haktuir.
Notísia relevante: APC rejista uma-kain 432 afetadu ba inundasaun no na’in-ualu kanek
Nia afirma, Komandu Operasionál APC munisípiu sira kontinua halo levantamentu detallu kona-ba sasán ne’ebé estragu no lakon.
“Ami foti dadus ne’e depende ba kazu hanesan ahi han uma ami apoiu fatin ba viziñu sira ne’ebé seguru nune’e sira labele hetan tan dezastre. Depois dadus ne’e ami halo verifikasaun liuhusi sistema hafoin ami bele apoiu ba vítima sira,” Nelson tenik.
Jornalista: Felicidade Ximenes
Editór: Xisto Freitas da Piedade