iklan

NASIONÁL, HEADLINE

Reprezentante povu sira kontinua preokupa ho kondisaun estrada

Reprezentante povu sira kontinua preokupa ho kondisaun estrada

Kondisaun estrada iha Eraulu, Letefoho, munisípiu Ermera iha tempu udan, kuarta (04/05/2022). Imajen Tatoli/António Daciparu

DILI, 20 janeiru 2025 (TATOLI)Reprezentante povu sira liuhusi sesaun plenária Parlamentu Nasionál (PN), segunda ne’e, kontinua preokupa ho kondisaun estrada, nune’e husu ba Governu atu tau atensaun.

Deputadu Bankada opozisaun husi Kmanek Haburas Unidade Nasionál Timoroan (KHUNTO), Luís Roberto, relata, populasaun iha knu’a Kumu-Lala aldeia Kai-denu-lala, suku Ossa-Uala, postu adminstrativu Vemasse, munisípiu Baucau seidauk asesu ba eletrisidade, bee-moos no kondisaun estrada a’at.

“Uma-kain 40 iha knu’a Kumu-Lala aldeia Kai-denu-lala, suku Ossa-Uala sente katak, ukun-an ba sira seidauk hetan tanba la asesu ba eletrisidade, sira moris iha nakukun nia laran,” nia hato’o iha sala plenária.

Aleinde ne’e, kondisaun estrada iha área ne’ebá ladi’ak, liuliu iha tempu udan, nune’e difikulta komunidade atu lori produtu lokál ba merkadu.

Notísia relevante : Governu lansa projetu reabilitasaun estrada dirasaun Loilubo-Fatumaca

Nune’e, Deputadu ne’e husu reprezentante Governu ne’ebé akompaña diskusaun ne’e atu enkamiña prekupasaun sira ba ministériu relevante hodi bele fó solusaun.

Iha fatin hanesan, Deputada Bankada Governu husi Partidu Demokrátiku (PD), Sanhia Tilman, haktuir, bainhira nia halo vizita iha postu Fohoren iha semana kotuk hodi observa kondisaun estrada sira, nota katak kondisaun estrada a’at tebes, liuliu bainhira tempu udan, komunidade labele halo movimentu tanba tahu maka’as, nune’e komunidade lokál, autoridade lokál no parte Parókia aterru estrada ho rai de’it, maibé iha tempu udan bee lori.

Deputada ne’e observa mós estrada iha Lolotoe, nota katak nia kondisaun a’at, bainhira Ambulánsia ida iha semana kotuk atu transfere medikamentu bá Maliana Lolotoe, la konsege ultrapasa tanba kondisaun estrada ladi’ak, nune’e medikamentu transfere fali ba karreta seluk hodi lori to’o Lolotoe.

“Komunidade husu Ministériu Obra Públika (MOP) hodi orienta Institutu Jestaun Ekipamentu no Apoiu Dezenvolvimentu Infraestrutura Institutu Públiku (IGEADE, I.P) atubele normaliza estrada no valeta, no husu mós MOP ho orsamentu tinan 2025 ne’ebé aprova ona atubele implementa iha tinan ne’e hodi bele hadi’a estrada,” nia akresenta.

Deputadu Bankada Governu husi Congresso Nacional da Reconstrução Timorense (CNRT), CNRT, Marcos Soares Martins, husu ba IGEADE, I.P atu normaliza estrada ba Era-Ulu ba diresaun Atsabe.

Deputadu PD, Manuel Noronha, hato’o preokupasaun populasaun husi suku Koliati Leutelu postu Hatulia, ne’ebé ho kondisaun estrada ligasaun Koiliati bá suku Raimerhei ladi’ak no grave, ho totál populasaun 3159. Suku ne’e rasik ponténsia ba produtu kafé, maek, baunilla no seluk tan.

Aleinde ne’e, suku Koliati iha aldeia hitu ne’ebé to’o agora komunidade seidauk asesu ba eletrisidade.

Deputadu CNRT, Anacleto Freitas, hateten, durante nia halo vizita eleitór foin lalais iha Uatulari, ba dahuluk povu iha área Tetulai, Sikirali no Bubulaku nia preokupasaun mak eletrisidade tanba to’o agora seidauk asesu.

“Daruak, ha’u hakarak ko’alia kona-ba suku Sana, iha ne’ebá bee atu sobu ita-nia komunidade, nune’e sira ezije hato’o hela ba ministériu relevante halo morru protesaun,” nia hato’o.

Deputada CNRT, Carminda Carlota, foti kestaun kona-ba estrada iha kapitál Dili iha área Bairru Pité, Farol no fatin seluk tan ne’ebé hahú a’at, ho ida-ne’e nia husu ba ministériu kompetente atu toma konsiderasaun.

Nia husu mós ba IGEADE, I.P atubele tau-matan ba estrada iha Zulo, postu Lolotoe ne’ebé a’at, difikulta komunidade atu la’o bá-mai husi suku ida bá suku seluk.

Deputadu CNRT, Saul Salvador, hato’o preokupasaun populasaun ba estrada iha suku Madohi iha aldeia Rosário iha Beto iha Dili, ne’ebé tinan barak ona MOP la tau atensaun, nune’e fó hanoin atu reabilita tanba iha tempu udan estrada ne’e tahu nakonu no iha bailoro rai rahun maka’as afeta populasaun nia saúde.

“Tuir fali estrada kontetividade entre Dili ho Covalima. Husi Dili to’o Ainaro hanoin estrada di’ak, husi fali Sarai to’o Zumalai estrada ne’e to’o agora la hadi’a, ne’e estrada protokolu entaun se bele karik planu ne’e hahú husi kapitál, konetividade liga munisípiu ho munisípiu no oinsá asegura ita-nia ekonómia la’o di’ak,” Deputadu ne’e fundamenta.

Tuir fali, nia dehan estrada munisípiu bá postu Tilomar Fohoren, ne’ebé bainhira tempu udan bee mak liu fali iha estrada laran, entaun transporte labele ultrapasa.

“Ida-ne’e preokupasaun mai husi komunidade oinsá atu hadi’a,” Deputadu tenik.

Nune’e, Reprezentante Governu liuhusi Vise-Ministru ba asuntu Parlamentár, Adérito Hugo, rejista prekupasaun Deputadu sira-nia no kompromete sei enkamiña ba ministériu tutela hodi bele hato’o resposta eskrita no tau atensaun.

Jornalista     : Nelson de Sousa

Editora          : Julia Chatarina

iklan
iklan

Leave a Reply

iklan
error: Content is protected !!