iklan

EKONOMIA, BAUKAU, HEADLINE, MUNISÍPIU

Governu lansa projetu reabilitasaun estrada dirasaun Loilubo-Fatumaca

Governu lansa projetu reabilitasaun estrada dirasaun Loilubo-Fatumaca

Eskavatór suru rai nu'udár simbolikamente hahú ona lansamentu reabilitasaun estrada rurál dirasaun Loilubo bá Fatumaca, sesta (17/01/2025). Imajen TATOLI/Natalino Belo

BAUCAU, 17 janeiru 2025 (TATOLI)—Governu liuhosi Ministériu no Planeamentu Investimentu Estratéjiku (MPIE), sesta ne’e, hala’o lansamentu ba kontinuasaun reabilitasaun estrada dirasaun suku Loilubo, Postu Administrativu Vemasse, bá Fatumaca, Suku Gariuai, Postu Administrativu Baucau Vila.

Ministru Planeamentu no Investimentu Estratéjiku (MPIE), Gastão de Sousa, esplika Governu deside kontinua reabilita estrada referida tanba MPIE hakarak investe osan iha área produtiva liuhosi reabilitasaun estrada.

Governante ne’e husu ba kompañia sira ne’ebé sei reabilita estrada referida atu implementa serbisu ho seriedade no responsabilidade liuliu termina tuir kontratu.

“Ha’u hakarak hateten de’it projetu ne’e tenke termina tuir tempu tanba sei laiha extensaun,” Gastão informa iha fatin lansamentu, suku Loilubo.

Ministru Planeamentu no Investimentu Estratéjiku (MPIE), Gastão de Sousa, hato’o nia deskursu iha seremónia lansamentu reabilitasaun estrada rurál iha suku Loilubo, sesta (17/01/2025). Imajen TATOLI/Natalino Belo

Governu konsidera estrada iha área rurál sai fatór determinasaun ba povu tanba bele ajuda agrikultór sira transporta produtu ba merkadu no estudante sira asesu ba eskola.

Iha fatin hanesan, Diretór Kompañia Jolitoni, Julito, hateten prontu ezekuta serbisu tuir akordu ne’ebé previstu ona liuhosi kontratu tanba sei implementa obra ho maneira serbisu ekipa no garante sei finaliza tuir durasaun tempu ne’ebé determinadu ona.

“Ami fiar ba ami-nia ekipa no ekipamentu. Ida-ne’e la’ós foin dahuluk tanba ami kontinua fali de’it hosi pakote dahuluk ho daruak ninian,” Julito tenik.

Notísia relevante: Governu hakarak dudu dezenvolvimentu sosiál, ekonómiku, no infrastrutura ho orsamentu 2025

Aleinde  ne’e, Xefi Suku Loilubo, Joanico da Costa Freitas, lori autoridade lokál hato’o agradese ba Governu tanba kontinua reabilita estrada dirasaun Loilubo ba Fatumaca ne’ebé nu’udár área potensiál iha setór agrikultór no sei benefísia komunidade.

Estrada referida fahe ba pakote tolu, iha-ne’ebé Kompañia Jolitoni Unip. Lda kaer pakote III ho totál kilómetru 6.025 ho valór orsamentu $3.850,083,25, Kompañia Glory Enterprise kaer pakote IV ho totál kilómetru 6.025 ho ninia orsamentu hamutuk $4.131,791,10 no Kompañia Golden Way sei reabilita pakote V ho kilómetru 6.040 ho valór orsamentu hamutuk $4.050,246.70.

Kompañia tolu referida sei reabilita estrada pakote tolu ne’e ho durasaun tinan ida ne’ebé sei hahú hosi janeiru 2025 no sei ramata iha janeiru 2026 ho totál kilómetru 18.09 ne’ebé sei benefísia komunidade hosi suku Loilubo, Umo Ana Olu, Uma Ana Iku no Gariuai.

Jornalista: Natalino Belo 

Editór: Xisto Freitas da Piedade 

iklan
iklan

Leave a Reply

iklan
error: Content is protected !!