DILI, 21 janeiru 2025 (TATOLI)--Meza Parlamentu Nasionál (PN) liuhusi reuniaun plenária, tersa ne’e, halo anúnsiu admisaun no baixa lejizlasaun rua ba Komisaun A ne’ebé trata asuntu Justisa no Konstituisionál.
Lejizlasaun rua ne’e mak hanesan proposta-lei númeru 15/VI (2a)-alterasaun dahuluk lei númeru 1/2017, 18 janeiru kona-ba rejime tranzitóriu rekrutamentu Majistradu no Defensór Públiku la’ós timoroan no alterasaun daruak lei númeru 9/2011, 17 agostu, ne’ebé aprova órganika Kámara Konta Tribunál Superiór Administrativu, Fiskál no Konta.
“Husu lei haruka ona ba iha komisaun, maibé lei ne’e Governu mai husu ho pedidu urjénsia, tanba ne’e husu komisaun reuni oras 24 hodi emite no aprova paréser kona-ba pedidu urjénsia, no ita aban sei iha plenária estraordinária atu aprova pedidu urjénsia ne’e,” Prezidente Parlamentu Nasionál interina no atuál Primeira Vise-Prezidente PN, Maria Terezinha Viegas, fó sai iha sala plenária, tersa ne’e.
Kona-ba konteúdu proposta-lei ne’e meza seida’uk fó sai detallu, tanba komisaun espesializada permanente sei fó uluk apresiasaun inisiál, hafoin sei kontinua prosesu tuir mai.
Notísia relevante : PN sei halo re-apresiasaun ba estatutu majistradu judisiál
Iha loron 04 dezembru 2024, Governu liuhusi reuniaun Konsellu Ministru (KM) aprova projetu proposta-lei kona-ba alterasaun dahuluk rejime tranzitóriu rekrutamentu Majistradu no Defensór Públiku sira la’ós timoroan.
Aleinde ne’e, aprova mós alterasaun daruak órganika Kámara Konta Tribunál Superiór Administrativu, Fiskál no Konta.
Proposta ne’e aprezenta husi Ministru Justisa, Sergio Hornai no Koordenadora Grupu Traballu Reforma Justisa, Lúcia Lobato.
Jornalista : Nelson de Sousa
Editora : Julia Chatarina
