SUIÇA, 21 janeiru 2025 (TATOLI) – Prezidente Repúblika José Ramos-Horta ho Ministra Ambiente no Enerjia Portugal, Maria Graça Carvalho, informalmente, hasoru malu, aborda asuntu kooperasaun ambientál, iha marjen Enkontru Anuál Fórum Ekonómiku Mundiál, iha Davos, Suiça, tersa ne´e.
Sorumutu ne´e, Ministra ambiente no enerjia portugeza ne´e fahe mós iha nia konta ofisiál Twitter, hodi espresa nia onra tan envolve Xefe Estadu Timor-Leste, hodi diskute asuntu globál krusiál sira inklui sustentabilidade ambientál no tranzisaun enerjétika.
Prezidente Repúblika José Ramos-Horta ho Ministra Maria Graça nia hasoru malu ne´e simboliza espíritu forte kooperasaun entre Timor-Leste no Portugal, reforsa lasu istóriku no kulturál sira ne’ebé halibur nasaun rua ne’e, hodi subliña importánsia kresente husi diplomasia ambientál iha árena globál.
Entretantu, Timor-Leste no Portugal nu´udar país ho direitu plenu ba organizasaun luzófona, Komunidade país ho lian portugés (CPLP, sigla portugés) hamutuk ho país membru sira seluk hanesan Angola, Brasil, Cabo Verde, Guiné-Bissau, Guiné-Equatoriál, Moçambique no São Tomé e Principé.
País rua iha relasaun no kooperasaun diplomátika iha área oioin no sei kontinua dezde Timor-Leste restaura nia indenpedénsia to´o ohin loron.
Jornalista: Jogerjo Guterres
Editór: Rafael Ximenes de A. Belo
