DILI, 22 Janeiru 2025 (TATOLI) – Governu renova mandatu Jaime Fernando dos Mártires Carvalho Correia nu’udar Prezidente Konsellu Diretivu Imprensa Nasionál Timor-Leste, I.P nian ba períodu tinan haat.
Projetu rezolusaun Governu ne’e aprezenta husi Ministru Prezidénsia Konsellu Ministrus, Agio Pereira, iha reuniaun Konsellu Ministru nian, iha Palásiu Governu, ohin.
“Desizaun ne’e bazeia ba kapasidade téknika, esperiénsia no kompeténsia komprovada ne’ebé hatudu ona iha jestaun entidade ida-ne’e nian, hodi rekoñese katak kontinuidade iha dezempeñu funsaun sira sei garante izensaun, imparsialidade no idoneidade sira ne’ebé presiza”, refere nota husi Governu.
Rekorde katak Konsellu Ministru, antes ne’e nomeia, iha 16 Dezembru 2020, Jaime Correia, nu’udar Prezidente Konsellu Diretivu INTL ba mandatu tinan haat.
Nomeasaun ne’e liuhusi projetu rezolusaun Governu, ne’ebé aprezenta husi antigu Ministru Prezidénsia Konsellu Ministru, Fidelis Magalhães.
Depoizde nomeasaun husi Governu, Jaime Correia simu pose, iha 14 Janeiru 2021, iha Palásiu Governu, iha Dili, hamutuk ho Beatriz Ximenes Martins nu’udar Vise-Prezidente no Vogál Konsellu Diretivu nian, Elídio da Cruz de Carvalho nu’udar Vogál Konsellu Diretivu nian no Natalino Auxiliadora hanesan Fiskál Úniku INTL nian.
Lembra katak Imprensa Nasionál harii iha 1960 hanesan instituisan ida iha tempu ne’ebá, iha misaun hodi halo publikasaun ba atu ofisiál sira Governu koloniál nian no halo produsaun ba formuláriu ofisiál sira.
Durante okupasaun indonézia, nafatin hala’o atividade hanesan, ho naran “Badan Percetakan Nasional”. Ho restaurasaun independénsia Repúblika Demokrátika Timor-Leste nian, hanaran fali “Gráfika Nasionál”.
Iha 2013, hahú prosesu transformasaun ida, ho aprovasaun ba ninia Planu Estratéjiku Reestruturasaun no Modernizasaun, ho objetivu atu transforma nia neineik-neineik ba empreza moderna ida no autosustentavel. Prosesu ida-ne’e lori ona nia atu tama iha merkadu nasionál, iha 2016, bainhira hahú halo servisu sira produsaun gráfika nian, nomós ba entidade privada sira. Iha 2017, muda ba institutu públiku no alteran nia naran ba ida-ne’ebé ohin loron koñesidu, “Imprensa Nasionál Timor-Leste”.
Notísia relevante: PCM ofisializa estrutura INTL,I.P
Jornalista: Arminda Fonseca
Editora: Maria Auxiliadora
