DILI, 22 Janeiru 2025 (TATOLI) – Sekretaria Estadu Formasaun Profisionál no Empregu (SEFOPE) no Embaixada Timor-Leste iha Koreia Súl halo esforsu atu lori fila kadáver traballadór José António Rebelo mai Timor-Leste (TL).
Asistente Adidu Traballadór Timor-Leste iha Koreia Súl, José Sebastião Coli Soares, informa katak kauza husi traballadór timoroan ne’e mate tanba hetan asidente mota, ne’ebé xoke poste eletrisidade iha loron 01 Setembru 2024 iha tuku o7h00.
Nia relata katak depoizde hetan asidente lori kedan vítima ne’e bá Ospitál Daejon hodi halo tratamentu saúde durante fulan haat no hakotu iis iha loron 18 Janeiru 2025.
“Hahú kedas iha loron 18, ekipa adidu halo kedas kontaktu hodi buka solusaun ba prosesu lori mate-isin fila bá Timor-Leste”, asistente adidu ne’e adianta ba Tatoli via WhatsApp, ohin.
Kona-ba atu translada kadáver ne’e, Embaixada Timor-Leste iha Seul liuhusi ekipa adidu hamutuk ho SEFOPE sidauk bele fó data fixu, tanba sidauk hetan ajénsia viajen ne’ebé atu tula mate-isin.
“Bainhira ami hetan ona ajénsia ruma maka husi ekipa adidu hamutuk ho SEFOPE sei informa ba família no públiku”, nia dehan.
Matebian José António Rebelo moris iha Becora, iha loron 17 Jullu 1995. Nu’udar traballadór timoroan ne’ebé bá serbisu iha Koreia Súl iha 08 Janeiru 2019 no serbisu iha empreza SJ Family, iha Provínsia Gyeongido, iha área Pocheon.
Iha loron 16 Juñu 2022, nia muda fali serbisu bá empreza FR Koria, iha provínsia Chungchung-namdo Nonsan-si to’o hakotu iis.
Notísia relevante: Mate-isin traballadór ida hosi Koreia Súl to’o Dili iha domingu
Jornalista: Arminda Fonseca
Editora: Maria Auxiliadora
