DILI, 22 janeiru 2025 (TATOLI)—Diretora Jerál Servisu Migrasaun (SM), Inspetora Xefe Polísia Adelaide da Rosa, hateten SM deporta sidadaun estranjeira hamutuk 124 ne’ebé viola vistu durante tinan 2024.
“Durante tinan 2024, ita halo prosesu hamutuk 647. Husi númeru ne’e, ita hala’o prosesu ba sidadaun estranjeira ema 40. Ita halo dilijénsia simples no prosesu administrativu ba ema estranjeiru hamutuk 482. Ita abandona voluntária ba sidadaun estranjeira ne’ebé viola vistu hodi deporta bá sira-nia nasaun orijen durante tinan 2024 ne’e iha ema na’in 124,” Adelaide ba TATOLI iha nia kna’ar fatin, Vila Verde, Dili, kuarta ne’e.
Diretora Jerál Servisu Migrasaun ne’e hateten, bá oin, Servisu Migrasaun sei kontrola maka’as sidadaun estranjeira ne’ebé tama iha territóriu nasionál.
“Ita halo kooperasaun ho komandante polísia munisípiu sira, tanba instalasaun ba Servisu Migrasaun la kobre munisípiu sira. Tanba ne’e, ita husu komandante polísia munisípiu sira atu kontinua halo operasaun ba sidadaun estranjeira sira ne’ebé hela over stay iha ita-nia rai inklui ba sira ne’ebé uza sala vistu,” nia adianta.
Notísia relevante: Servisu Migrasaun destaka ona adidu migrasaun iha nasaun hitu
Adelaide rekoñese katak Servisu Migrasaun la konsege kontrola sidadaun sira-nia movimentu no vistu saida mak sira uza. Tanba ne’e, SM kolabora nafatin ho autoridade seguransa liuliu Komandu PNTL Munisípiu sira hotu no autoridade lokál atu kontrola ema sira-ne’e.
“Ami mós kontinua sosializa lei númeru: 24/2024, 24 maiu, primeira alterasaun lei númeru 11/2017, 24 maiu, ne’ebé ko’alia kona-ba migrasaun no azilu, atu ema hotu hatene lei ne’e karik sidadaun estranjeira balun viola sira bele informa ba ami nune’e ita bele foti medida,” nia afirma.
Nia hatutan, durante 2024, emisaun vistu ba sidadaun estranjeira sa’e maka’as kompara ho tinan sira liubá kotuk, tanba iha tinan 2024 SM emite vistu ba ema estranjeiru hamutuk 5000 resin.
Iha biban ne’e, Diretora Jerál Servisu Migrasaun mós informa katak, durante 2024, Servisu Migrasaun ezekuta desizaun Tribunál nian hodi halo espulsaun ba sidadaun estranjeira na’in ida ne’ebé antes ne’e envolve iha kazu brankeamentu kapitál.
Nia haktuir tan, durante 2024, Servisu Migrasaun rejista ema na’in 5.928 ne’ebé mak aplika vistu online.
Servisu Migrasaun hanesan servisu seguransa ida-ne’ebé diretamente subordina ba Ministériu Interiór, ho nia kna’ar asegura lei migrasaun no azilu, liuhusi kontrola sirkulasaun ema-nian iha fronteira, portu, aeroportu, hela no atividade ema rai-li’ur sira-nian iha territóriu nasionál.
Jornalista: Natalino Costa
Editór: Xisto Freitas da Piedade
