DILI, 22 janeiru 2025 (TATOLI)—Diretora Jerál Servisu Migrasaun (SM), Inspetora Xefe Polísia Adelaide da Rosa, informa SM destaka ona adidu migrasaun iha nasaun hitu atu fó atendimentu vistu no estensaun vistu ba timoroan sira.
Nia esplika, nasaun hitu ne’ebé Servisu Migrasaun destaka ona ninian adidu migrasaun mak hanesan Indonézia, Malázia, Singapura, Filipina, Austrália, Portugál no Xina.
“Iha Indonézia, ita-nia adidu migrasaun destaka iha Bali no Atambua. Entretantu, iha Singapura na’in ida, Austrália ida, Malázia ida, Filipina ida, Portugál ida no Xina ida. Bá oin, ita-nia adezaun ba ASEAN (The Association of Southeast Asian Nations), entaun ita tenke koloka ita-nia adidu migrasaun sira-ne’e hotu inklui nasaun seluk ne’ebé ita-nia estudante halo movimentu ba,” Adelaide ba TATOLI iha nia kna’ar fatin, Vila Verde, kuarta ne’e.
Notísia relevante: Servisu Migrasaun kolleta millaun $2.1 iha 2024
Nia hatutan, ba futuru, nasaun sira ne’ebé tama mai Timor-Leste atu halo investimentu boot, Servisu Migrasaun sei koloka nia adidu migrasaun iha ne’ebá nune’e bele halo atendimentu ba dokumentu vistu no estensaun vistu.
Servisu Migrasaun hanesan servisu seguransa ida-ne’ebé diretamente subordina ba Ministériu Interiór, ho nia kna’ar asegura lei migrasaun no azilu, liuhusi kontrola sirkulasaun ema-nian iha fronteira, portu, aeroportu, hela no atividade ema rai-li’ur sira-nian iha territóriu nasionál.
Jornalista: Natalino Costa
Editór: Xisto Freitas da Piedade