DILI, 22 janeiru 2025 (TATOLI)—Diretora Jerál Servisu Migrasaun, Inspetora Xefe Polísia Adelaide da Rosa, hateten Servisu Migrasaun kolleta osan millaun $2.1 bá kofre Estadu durante tinan 2024 nia laran.
Nia esplika reseita sira-ne’e mai husi tarefa ba vistu hamutuk $1.804.260 no reseita ne’ebé hetan liuhusi aplikasaun koima hamutuk $359.670.
“Totál reseita ne’ebé mak Servisu Migrasaun kolleta hamutuk $2.173.000.930,” Adelaide hateten ba TATOLI iha nia kna’ar fatin, Vila Verde, kuarta ne’e.
Nia hatutan, komparasaun reseita durante tinan tolu nia laran hahú husi tinan 2022 Servisu Migrasaun kolleta millaun $1.6, iha 2023 millaun $2.0 no iha 2024 kolleta millaun $2.1.
Notísia relevante: Servisu Migrasaun introdús matéria haat kona-ba Lei Migrasaun no Azilu
Adelaide informa, planu ba futuru Servisu Migrasaun mak sei mellora liután atendimentu iha postu fronteira sira no mós kapasita membru sira ba utilizasaun Migration Information and Data Analysis (MIDAS) nune’e bele fasilita sira halo servisu iha terenu ho di’ak liután.
“Mellora di’ak liután sistema kontrola ho naran MIDAS nune’e bele integra sistema kontrolu bá fronteira ho nia operasaun sira, liga ba sistema iha vistu ninian. Nune’e, hafasil kontrolu bainhira ema ne’ebé vizita ita-nia rai kuandu sira-nia viza over stay, entaun sistema ne’e bele alerta bá postu fronteira no sistema operasaun sira iha fronteira para hafasil operasaun sira iha pontu entrada,” nia konklui.
Servisu Migrasaun hanesan servisu seguransa ida-ne’ebé diretamente subordina ba Ministériu Interiór, ho nia kna’ar asegura lei migrasaun no azilu, liuhusi kontrola sirkulasaun ema-nian iha fronteira, portu, aeroportu, hela no atividade ema rai-li’ur sira-nian iha territóriu nasionál.
Jornalista: Natalino Costa
Editór: Xisto Freitas da Piedade