BOBONARO, 22 janeiru 2025 (TATOLI)—Xefe suku Molop, postu administrativu Bobonaro, munisípiu Bobonaro, António Maia, hatete tuir loloos atendimentu saúde ba komunidade iha suku Molop ne’e hahú funsiona iha 15 janeiru 2025, maibé to’o agora seidauk bele hala’o tanba EDTL, E.P seidauk fornese enerjía elétrika.
Notísia Relevante: Komunidade Molop defísil asesu bee-moos iha tempu bailoro
“Ba ha’u sei hasoru problema uitoan, tanba ágora daudaun ne’e ahí (eletrisidade) mak seidauk liga. Iha 17 dezembru 2024 ne’e, kompañia ba rejistu ona maibé ate ágora laiha resposta husi EDTL, E.P, ne’ebé to’o ágora eletrisidade seidauk lakan. Profisionál saúde, hanesan doutór no emfermeiru/a destakadu sira to’o agora seidauk hala’o servisu,” Nia hateten ba Agência Tatoli liuhusi telefónika, tersa ne’e.
Atu fasilidade saúde ne’e funsiona iha tempu badak, nia husu ba EDTL, E.P tau konsiderasaun no tau priroridade ba propósta ne’ebé kompañia submete, nune’e doutór no emfermeira sira bele hala’o ona sira-nia kna’ar.
“Komunidade Molop bainhira hetan moras karik, sira la presiza ba tan postu saúde iha suku Subini no sentru saúde Bobonaro Vila,” nia hateten.
Diretór Servisu Saúde Munisípiu Bobonaro, Gíl Bernardo Vicente, reforsa médiku ho Parteira ida preparadu atu halo atendimentu saúde ba komunidade iha postu saúde Molop ne’e, maibé instalasaun eleterisidade mak seidauk iha.
“Instalasaun eletrisidade seidauk iha, ida-ne’e mak prezudika sira atu ba hala’o sira-nia servisu. Se instala ona, ita bele hahú halo atendimentu,” Diretór Saúde Munisípiu Bobonaro ne’e dehan.
Nia mos rekoñese, daudaun ne’e materiál eskritóriu nian no ekipamentu saúde balun seidauk instala iha fasilidade saúde foun ne’e, maibé nia parte halo ona pedidu ba nasionál.
“Ami husu ekipamentu sira-ne’e lori mai, nune’e ami lori ba tau iha fatin ne’ebá, atu kolega sira bele hahú halo ona servisu ka halo atendimentu ba pasiente sira iha fatin ne’e,” nia hateten.
Koordenadór EDTL, E.P Munisípiu Bobonaro, Mario de Jesús, rekoñese empreza Senizu Unipesoál, Lda, rejista iha 17 dezembru 2024 maibé to’o ágora seidauk bele fornese enerjía elétrika tanba kestaun klima.
“Ida-ne’e la’ós dehan katak ami la tau atensaun ba obra ida-ne’e, maibé natureza mak la fó tempu ba ami atu ba halo Nova ligasaun iha ne’ebá. Ita hatene katak agora daudaun rai udan, atu ba mós ita sei hakat ka hakur mota. Ida-ne’e mak preokupasaun mai ami maibé agora daudaun ami haree situasaun normál uitoan ona no iha tempu badak ami bele halo instalasaun,” nia dehan.
Distánsia entre fasilidade saúde foun ne’e ho liña jerál eletrisidade ne’e kuaze metru 30, nia dehan, postu saúde Molop prienxe kritéria no merese atu hetan nova ligasaun enerjía elétrika.
Entretantu, postu saúde Molop no rezidénsia ba pasoál saúde ne’e empreza lokál Senzju Unipesoál, Lda, mak konstrui liuhusi projetu Planu Integradu Dezenvolvimrntu Munisipál (PDIM) tinan 2024 ho orsamentu hamutuk $217,666.38.
Antes ne’e, iha dezembru 2024, Prezidente Autoridade Munisípiu (PAM) Bobonaro, Alexandre Pires, iha dezembru 2024, hala’o tiha ona inaugurasaun ba postu saúde founiha suku Molop, postu administrativu Bobonaro, munisípiu Bobonaro, atu fó atendimentu saúde ba kamunidade iha fatin ne’e.
Notísia Relevante: AMB hahú konstrui postu saúde Molop no reabilita estrada Mazop
Jornalista : Sérgio da Cruz
Editór : Cancio Ximenes
