DILI, 23 janeiru 2025 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, hateten F-FDTL prontidaun kontinua partisipa misaun pás Organizasaun Nasaun Unida (ONU) nian iha Sudaun Súl.
Nia dehan, hanesan Xefe Estadu Maiór Jenerál F-FDTL nian iha ona kalendáriu própriu atu kontinua fó kapasitasaun formasaun ba efetivu sira liuhusi Sentru Treinamentu Operasaun Apoia Pás ne’ebé iha Metinaro atubele prepara duni unidade ka batallaun ida atubele partisipa iha misaun apoia pás ONU nian.
“Ha’u iha kalendáriu hahú tama iha tinan ida-ne’e atu prepara ita-nia efetivu sira oinsá ita prepara unidade ka batallaun ida nune’e sira bele envolve iha misaun apoia pás ONU nian iha rai-li’ur,” Falur hateten liuhusi ninia intervensaun iha ámbitu Forsa Armada Austrália entrega botas ba F-FDTL ne’ebé hala’o iha Sentru Instrusaun Prezidente Nicolau Lobato Metinaro, Dili, kinta ne’e.
Notísia relevante: Komandu F-FDTL simu karta hosi ONU partisipa misaun pás iha Sudaun Súl
Nia hatutan, Timor-Leste prepara nia efetivu ne’ebé atu partisipa iha misaun pás ONU nian iha rai-li’ur ne’e depende ba nesesidade no kustu ne’ebé iha.
Nia haktuir, hanesan Xefe Estadu Maiór F-FDTL, momentu ne’ebá hala’o enkontru ho ONU iha Nova Iorke hodi ko’alia Timor-Leste nia partisipasaun iha misaun pás nune’e ONU rekomenda ba Timor-Leste atu aproxima ho nasaun sira iha ASEAN (The Association of Southeast Asian Nations) no momentu ne’e Timor-Leste aproxima uluk Malázia, maibé Timor haree Malázia nia ekipamentu militár no kulturál lahanesan ho Timor.
“Nune’e, ita aproxima filafali Tailándia no ita haree entermu ekipamentu militár no kulturál ita ho sira hanesan, tanba ne’e ita aseita hakarak integra hamutuk ho Tailándia iha misaun pás ONU nian,” nia adianta.
Nia haktuir, iha ámbitu transformasaun FALINTL ba Forsa Defeza Timor-Leste ba dala 24 iha tinan ne’e, husi diretór jerál sentru treinamentu Peace Keeping Force Tailándia sei mai hodi partisipa serimónia referida.
Jornalista: Natalino Costa
Editór: Xisto Freitas da Piedade