DILI, 23 Janeiru 2025 (TATOLI) – Institutu Jestaun Ekipamentu no Apoiu Serbisu Infraestrutura (IGEADI), iha futuru, fakar sedimentasaun iha Tíbar, tanba Dili laiha ona espasu.
Sedimentasaun iha kapitál nafatin eziste tanba poulasaun balun kontinua okupa foho-lolon sira iha Dili, nune’e hamosu sedimentasaun barak.
Ministru Obra Públika, Samuel Marçal, rekoñese katak IGEADI hasoru difikuldade iha kapitál atu tau sedimentasaun, tanba laiha ona espasu.
“Ha’u ko’alia ona ho Ministériu Turizmu no Ambiente oinsá ko’alia ho komunidade hodi labele hela iha foho-lolon. Sedimentasaun kontinua barak ne’e mai husi komunidade ke’e rai iha foho-lolon”, Samuel Marçal dehan iha Palásiu Governu.
Nia haktuir katak bainhira sedimentasaun kontinua barak mak mota sira sei nakonu no bee halai la tuir nia dalan, nune’e afeta fali ba Dili laran. “Durante ne’e ita-nia ekipa IGEADI nafatin normaliza sedimentasaun sira bá fakar iha Bebonuk, B. J. Habibie, maibé nakonu ona, ida ne’e sai preokupasaun boot ida”, dehan.
Maibé, tuir nia, Primeiru-Ministru, Xanana Gusmão, mós rona ona no sei bá Tíbar haree fatin lixu nian, inklui fatin fakar sedimentasaun iha futuru.
“Ita agradese tanba iha kompañia balun sosa lixu hanesan besi-tua, inklui áqua sira halo resiklajen, maibé sedimentasaun la’e, ohin ita suru sai, aban nakonu fali, tanba udan halo mota tun lori nafatin sedimentasaun mai”, nia salienta.
Iha sorin seluk, Prezidente IGEADI, Ana Paula da Cruz, dehan desizaun ne’ebé foti atu iha futuru fakar sedimentasaun bá Tíbar ne’e di’ak, tanba daudaun Dili nakonu ona no laiha ona fatin atu tau sedimentasaun.
“Haree bá fatin iha Tíbar ami mós sei ko’alia ho MOP, nune’e prevee orsamentu ba kombustivel nian, tanba karreta tula sai sedimentasaun todan no han kombustivel”, nia adianta.
Notísia relevante: IGEADI hasoru difikuldade ba fatin atu fakar sedimentasaun sira
Jornalista: Arminda Fonseca
Editora: Maria Auxiliadora