iklan

EKONOMIA, HEADLINE

IGEADI hasoru difikuldade ba fatin atu fakar sedimentasaun sira

IGEADI hasoru difikuldade ba fatin atu fakar sedimentasaun sira

IGEADI hasai sedimentasaun iha mota Bidau. Foto/IGEADI

DILI, 17 Janeiru 2025 (TATOLI) – Institutu Jestaun Ekipamentu no Apoiu Serbisu Instraestrutura, Institutu Públiku (IGEADI, I.P) hasoru difikuldade tanba laiha ona fatin iha Dili atu fakar sedimentasaun sira.

Prezidente IGEADI, Ana Paula da Cruz, hateten durante ne’e IGEADI hasai sedimentasaun no bá fakar iha área ponte BJ Habibie no Bebonuk nian, maibé nakonu ona, nune’e Governu tenke deside fatin ruma atu iha futuru bele tau sedimentasaun sira.

“Iha 2024 mak ita halo melloramentu, ita haree mota laran sira ne’e bainhira udan, mota-boot la’ós lori de’it bee, maibé fatuk, rai no rai-henek. Entaun, ita tenke hasai sedimentasaun, maibé agora fatin atu tau ne’e mak sai difikuldade ba ita”, Ana Paula dehan ba Tatoli, ohin.

Nia salienta katak, kada loron, ekipa halo serbisu iha mota laran hodi hasai sedimentasaun sira iha parte Comoro, Becusse no selut tan, maibé iha Dili ne’e komunidade okupa hotu, entaun atu hasai sedimentasaun hodi bá fakar ne’e susar tebes ba IGEADI.

Institutu hanoin hela meiu ida oinsá atu lori sedimentasaun sira ne’e bá fakar iha fatin dook hanesan iha Tíbar. “Maibé karreta sai ne’e tula todan no presiza kombustivel maka’as. Kada reuniaun ho Ministériu Obra Públika (MOP) ha’u sempre hato’o, tanba tasi-ibun sira iha Dili laran ami aterru hotu ona, maibé ita fakar beibeik loron ruma sai aas tiha, ita haree modelu tasi laiha”, Ana Paula preokupa.

Tuir nian difikuldade seluk ne’ebé hasoru mak dump truck sira ne’e balun tinan 15 ona no balun doasaun husi parseiru sira. “Ita haree kondisaun labele uza ona, maibé situasaun obriga ita halo manutensaun, maibé dalaruma forsa mak ladún iha”, nia dehan.

Notísia relevante: IGEADI poupa orsamentu Estadu millaun $6-resin

Jornalista: Arminda Fonseca

Editora: Maria Auxiliadora

iklan
iklan

Leave a Reply

iklan
error: Content is protected !!