Komisaun F husu empreza aselera konstrusaun unidade foun pediatria andár lima
DILI, 23 janeiru 2025 (TATOLI)—Komisaun F Parlamentu Nasionál ne’ebé trata asuntu saúde, seguransa sosiál no igualdade jéneru, husu ba empreza The China Civil Engineering Construction Corporation (CCECC) ne’ebé konstrui edifísiu unidade foun pediatria ho andár lima inklui Unidade Kuidadu Intensivu Kardiolojia (ICCU) iha Hospital Nacional Guido Valadares, Bidau, tenke aselera lalais ona.
“Fiskalizasaun ne’ebé ami halo ne’e haree mós ba konstrusaun ne’ebé la’o hela. Tanba ne’e, ami husu nafatin ba empreza, atu aselera sira-nia serbisu nune’e bele responde ba sira-nia promesa ne’ebé mak iha,” Prezidente Komisaun F Parlamentu Nasionál, Maria Gorumali Barreto ba jornalista sira iha HNGV, Bidau, kinta ne’e.
Gorumali esplika, papél Komisaun F nian atu tau-matan bá konstrusaun sira-ne’e tuir Bill of Quantities (BOQ) ka lae, depois empreza mós tuir duni promesa ka lae, tanba konstrusaun nia orsamentu ne’e reaprópria husi tinan kotuk liubá hafoin konstrusaun ne’e halo fali iha tinan 2024 no 2025.
Notísia relevante: Xefe Governu observa direta funsionamentu no konstrusaun pediátria iha HNGV
“Ita haree konstrusaun pediatria ne’e atinje ona 31.8%, maibé sira-nia konstrusaun hahú loloos iha fevereiru 2024. Problema ho lei aprovizionamentu no mós sei halo teste ba materiál konstrusaun nian iha laboratóriu, ida-ne’e mak lori tempu. Tanba ne’e mak foin atinje hanesan ha’u fó hatene ne’e,” nia relata.
Antes ne’e, Diretora Administrasaun Finansa no Lojístika HNGV, Sara Maria Xavier deklara katak konstrusaun pediatria andár lima no ICCU, gasta orsamentu hamutuk US$9.341,663.70.
Nia afirma, konstrusaun sei la’o hela, tanba ne’e hotu-hotu hein, atu bainhira finalizada bele rezolve ona espasu iha HNGV.
Lansamentu fatuk dahuluk ba konstrusaun referida hala’o husi Primeiru-Ministru, Taur Matan Ruak, akompañadu husi Vise-Primeiru-Ministru, José Maria dos Reis no Ministra Saúde, Odete Maria Freitas Belo, iha VIII Governu Konstitusionál nia tempu, iha 26 fulan-janeiru 2023.
Konstrusaun ba unidade foun ida-ne’e, antes ne’e espeta sei harii durante tinan rua nia laran (2023-2025), ho nia objetivu prinsipál hadi’a asesu no kualidade kuidadu espesializadu ne’ebé presta iha HNGV, ho atensaun espesiál ba internamentu kazu emerjénsia no urjénsia pediátrika nian. Ne’e sei permite mós hodi hadi’a resposta nasionál ba surtu esporádiku no emerjente denge, kólera no surtu sira seluk ho impaktu boot ba saúde públika, liuliu entre bebé foin moris, labarik no adolexente sira.
Jornalista: Felicidade Ximenes
Editór: Xisto Freitas da Piedade
