DILI, 23 Janeiru 2025 (TATOLI) – Primeiru-Ministru (PM), Xanana Gusmão, no Ministra Estadu Reinu Unidu ba Indo-Pasífiku, Catherine West, hasoru malu hodi diskute kona-ba kooperasaun entre nasaun rua ne’e.
“Ita-nia hasoru malu ohin ne’e ko’alia kona-ba apoiu tomak ne’ebé Reinu Unidu fó mai ita, liuhusi área oioin hanesan área ASEAN no polítika internasionál, tanba ita koñese Reinu Unidu iha prinsípiu sira ne’ebé ita mós hakarak tuir hanesan pás no estabilidade ba kooperasaun ho rai hotu”, Xanana Gusmão dehan iha Palásiu Governu, ohin.
Xefe Ezekutivu ne’e haktuir katak vizita husi Ministra Estadu Reinu Unidu ba Indo-Pasífiku mai Timor-Leste ne’e, tanba nia mós apoia Timor-Leste nia luta ba ukun rasik-aan iha Darwin-Austrália iha 1999.
“Sira mai hanesan serbisu kooperasaun iha área barak, nune’e ita hamutuk ho ha’u reforsa de’it kooperasaun ne’ebé iha. Lori Governu no povu nia-naran agradese tebes ba Reinu Unidu nia apoiu tomak, tanba iha ne’ebá timoroan liu rihun 30 ne’ebé serbisu. Kada tinan haruka osan millaun $20 to’o $30 mai Timor-Leste, ajuda ekonomia família nian”, primeiru-ministru relasa.
Iha fatin hanesan, Ministra Estadu Reinu Unidu ba Indo-Pasífiku, Catherine West, hateten nia sente orgullu no onradu tebes hodi vizita Timor-Leste, tanba ida-ne’e nia prezensa dahuluk iha Timor-Leste hodi hasoru malu ho primeiru-ministru.
“Nasaun rua ne’e sai ona belun iha tempu naruk no Reinu Unidu mós sai ona uma ba timoroan iha Reinu Unidu. Ami sei kontinua kompromisu atu fó apoiu ba Timor-Leste hodi dezenvolve sai nasaun ne’ebé sustentavel no próspera”, nia afirma.
Iha vizita ne’e, nia parte mós agradese tanba Timor-Leste nia Embaixadór ba Reinu Unidu, João Paulo da Costa Rangel, mós hola parte iha komité ba trata asuntu sira ba mudansa klimátika no empodera ba asuntu polítiku sira seluk.
“Ohin, ami-nia diskusaun mós ami ko’alia kona-ba dalan sira atu hametin ami-nia parseria sira iha área oioin, inklui Timor-Leste nia preparasaun adezaun ba ASEAN, inklui oinsá Timor-Leste halo prátika tiha ona ein termu polítika, nomós luta barak ba iha direitu umanu”, nia konklui.
Tuir nota husi MNEK, Ministra Reinu Unidu ba Indo-Pasífiku vizita Dili, entre loron 23 no 24 Janeiru 2025, hodi repete fali kompromisu Reinu Unidu nian atu apoia Timor-Leste nia adezaun ba ASEAN, nune’e mós atu reforsa apoiu liuhusi programa dezenvolvimentu Reinu Unidu nian.
Iha vizita ne’e, Ministra West hasoru malu ho Primeiru-Ministru Xanana Gusmão no figura seniór sira seluk hodi diskute asuntu xave sira ne’ebé ligadu ho relasaun bilaterál. Aleinde ne’e, partisipa mós iha eventu ‘Feto iha Diplomásia’, ne’ebé organiza husi Ministériu Negósiu Estranjeiru (MNEK), Timor-Leste no UN Women.
Jornalista: Arminda Fonseca
Editora: Maria Auxiliadora
