DILI, 24 Janeiru 2025 (TATOLI) – Ministra Estadu Reinu Unidu ba Indo-Pasífiku, Catherine West, sesta ne’e, vizita Arkivu Muzeu Rezisténsia Timorense (AMRT, sigla portugés) hodi kontinua hametin relasaun entre Reinu Unidu ho Timor-Leste ba futuru ne’ebé di’ak.
“Ita-nia Sekretária Parlamentár Negósiu Estranjeiru Reinu Unidu, Catherine West, ohin mai vizita ne’e atu hametin ita-nia relasaun amizade entre nasaun rua. Ha’u agradese tebes ba vizita ne’e, ida-ne’e importante tebes tanba liuhusi sira-nia vizita ne’e bele lori situasaun AMRT nia ba mundu no hamorin no fó naroman ba ita”, Diretór Ezekutivu AMRT, Jorge Alves, hatete iha Muzeu, Colmera, Dili.
Nia espera katak liuhusi vizita ne’e bele hametin liután bilaterál entre nasaun rua. Ida-ne’e importante tanba Sekretária Parlamentár Negósiu Estranjeiru ne’e mós hanesan ativista ida iha Austrália hodi apoiu prosesu Independénsia. Nune’e agradese tebes ba apoiu Solidariedade ne’e.
Ministra Estadu Reinu Unidu ba Indo-Pasífiku, Catherine West, dehan Timor–Leste nia ema barak iha UK no iha difikuldade barak, tanba ne’e liuhusi vizita ne’e bele kesi amizade ida-ne’e.
“Tanba ne’e ita hakarak servisu hamutuk hodi tau matan ba sira-nia moris. Ohin ha’u kontete hamutuk hodi selebara feto sira-nia susesu kona-ba igualade jéneru ne’e”, konklui.
Notísia relevante : Xanana no Catherine West aborda kona-ba apoiu Reinu Unidu ba Timor-Leste
Jornalista : Osória Marques
Editór : Zezito Silva