BAUCAU, 24 janeiru 2025 (TATOLI)—Governu liuhosi Ministériu Administrasaun Estatál (MAE), sesta ne’e, lansa ona Balkaun Únika iha munisípiu Baucau.
Ministru Administrasaun Estatál, Tomás do Rosário Cabral, esplika balkaun únika nu’udár sentru ida husi governu sentrál hodi halo serbisu atendimentu iha kada munisípiu tanba bazeia ba polítika governu atu hakbesik servisu ba komunidade.
“Ita sei prepara mós klínika mobile hodi atende populasaun iha postu administrativu sira, nu’udár kria kondisaun atu atende besik liu populasaun,” Tomás Cabral dehan iha seremónia lansamentu balkaun referida, Vila Nova, Baucau.
Entretantu, Prezidente Autoridade Munisipál (PAM) Baucau, Veneranda Lemos Martins, hateten programa referidu nu’udár kontinuasaun hosi Governu anteriór ho objetivu atu fasilita komunidade iha Baucau atu trata dokumentu iha portaun únika.
“Agradese ba Governu, ohin ita hamutuk iha fatin ida-ne’e atu halo lansamentu ba balkaun únika iha Baucau,” Veneranda Lemos tenik.
Eis deputada ne’e informa katak edifisiu balkaun únika hafoin lansamentu sei hahú funsiona iha semana oin, segunda, 27 janeiru.
Notísia relevante: PM Xanana lansa edifisiu no portal Balkaun Úniku iha Manatuto
Tuir planu, balkaun únika sei implementa iha munisípiu hotu inklui Illa Ataúro, ho atendimentu prezensiál, móvel no telefóniku hodi simplifika prosedimentu administrativu, hadi’a efisiénsia no promove prosimidade entre administrativu públiku no sidadaun sira.
Aleinde ne’e, konsolida no habelar funsionamentu portál munisipál nu’udár plataforma sentrál ba asesu informasaun no atendimentu públiku eletróniku, promove transparénsia no partisipasaun sívika.
Governu liuhosi reuniaun Konsellu Ministru, aprova Dekretu-Lei númeru: 3/2025, loron 22 janeiru, kona-ba balkaun únika no portál munisipál atu regulariza funsionamentu balkaun únika no portál munisipál atu reforsa desentralizasaun administrativa no moderniza serbisu públiku iha Timor-Leste.
Balkaun únika bele fasilita halais liután burokrasia no sei laiha tan halibur malu tanba de’it atu halo dokumentu pesoál sira hanesan Billete Identidade (BI), pasaporte, sertidaun nasimentu (moris) no seluk tan.
MAE ho liña ministeriál hamutuk ho serbisu munisipál 19 ne’ebé iha delegasaun kada munisípiu sei ajusta no implementa tuir dekretu-lei balkaun únika no portál munisipál nune’e sei sai sentru atendimentu iha balkaun únika ne’ebé estabelesida ona.
Antes ne’e, munisípiu Manatuto mak sai benefisiáriu dahuluk ba balkaun únika, ne’ebé lansa diretamente husi Primeiru-Ministru, Kay Rala Xanana Gusmão, iha 04 maiu 2024.
Balkaun únika hanesan rezultadu projetu parseria entre Programa Nasaun Unida ba Dezenvolvimentu (PNUD) no Ministériu Administrasaun Estatál (MAE) hanesan inovasaun importante ida husi Governu atu lori servisu públiku hodi besik ba sidadaun sira.
Primeiru-Ministru, Kay Rala Xanana Gusmão konsidera katak lansamentu ida-ne’e importante tebes tanba kria ona baze dadus ba desentralizasaun governu lokál no promove prosesu desentralizasaun no prestasaun servisu iha nível lokál.
Jornalista: Natalino Belo
Editór: Xisto Freitas da Piedade