DILI, 24 janeiru (TATOLI)—Ministériu Defeza (MD) entrega armamentu militár ba Komandu FALINTIL-Forsa Defeza Timor-Leste (F-FDTL) atu uza ba nesesidade institusionál.
Tipu armamentu militár ne’ebé Ministériu Defeza entrega mak Metralladora M249, Metralladora M60E6 no munisaun ho tipu Bala Real M4, Bala Real ho Pita, Bala Real 7.62 x 51 MM, Bala Real ho Pita 7.62xMM, Bala Pistola Real Glock 45, Bala Pistola Real Glock 23, Bala Simulada 5.56×45 no Bala Simulada ho Pita 5.56×45 MM.
“Ohin ita entrega arma tipu tolu mak hanesan Metralladora Lijeira M249 atu kompleta orgánika iha estrutura kombate nian. Ita mós entrega Metralladora Lateriál M60 hanesan semi pezadu. M60 ne’e nia funsaun atu destroi inimigu nia posizaun. Depois, ita mós entrega Pistola Glock ualu no munisaun,” Ministru Defeza, Donaciano Costa Gomes “Pedro Klamar Fuik”, hateten liuhusi nia intervensaun iha ámbitu serimónia entrega ekipamentu ba Komandu F-FDTL ne’ebé hala’o iha Kuatél Jenerál F-FDTL, Fatuhada, Dili, sesta ne’e.

Armamentu militár ne’e Governu halo akizisaun uza orsamentu 2023 nian ho montante $10.232,800 ne’ebé prevee ona iha Lei Programasaun Militár, maibé ministru la partilla armamentu ne’e ekizi iha nasaun ne’ebé tanba segredu defeza nasionál.
Notísia relevante: Ministru Defeza disponibiliza viatura ualu no armamentu
Nia informa, Governu iha obrigasaun atu halo investimentu ba militár oinsá atu moderniza nune’e instituisaun F-FDTL bele dezenvolve an di’ak liután sai instituisaun militár ne’ebé serbí Estadu no povu ho profisionál.
Ministru Defeza husu ba Komandu F-FDTL liuliu militár sira atu kuidadu sasán sira ne’ebé mak Governu entrega ona hodi uza ba nesesidade instituisaun ho responsabilidade.
Iha fatin hanesan, Xefe Estadu Maiór Jenerál F-FDTL, Tenente Jenerál Domingos Raul “Falur Rate Laek” agradese ba esforsu Governu ne’ebé sempre tau-matan ba instituisaun F-FDTL hodi dezenvolve an sai forsa ne’ebé modernu.
“Ha’u agradese ba esforsu senór ministru nian ne’ebé halo esforsu oinoin atu apoia instituisaun F-FDTL entermu rekursu umanu no materiál. Ida-ne’e duni mak ita-boot nia Palavra de Honra,” nia esklarese.
Falur afirma katak Governu hahú tau-matan ba F-FDTL, tanba ne’e husu ba militár sira hatudu komportamentu ne’ebé di’ak iha patika hodi kuidadu materiál militár ne’ebé Governu apoia ba F-FDTL.
Jornalista: Natalino Costa
Editór: Xisto Freitas da Piedade