DILI, 24 janeiru 2025 (TATOLI)—Ministru Defeza, Donaciano Costa Gomes “Pedro Klamar Fuik” lansa ofisialmente ba públiku planu mestre konstrusaun baze militár no rezidénsia ba militár sira ne’ebé sei hahú nia konstrusaun iha tinan ne’e.
“Ohin ita mós halo espozisaun ba públiku planu mestre baze militár no rezidénsia ba militár sira ne’ebé apartir tinan ne’e sei halo nia konstrusaun,” Klamar Fuik hateten iha nia intervensaun iha ámbitu serimónia entrega ekipamentu ba Komandu F-FDTL ne’ebé hala’o iha Kuartél Jenerál F-FDTL, Fatuhada, Dili, sesta ne’e.
Nia dehan, planu mestre ida-ne’e importante ba infraestrutura militár nune’e bá oin bele hatene prioridade Ministériu Defeza nian ba dezenvolvimentu forsa.
Notísia relevante: Ministru Defeza kompromete harii kazerna ba membru F-FDTL
Klamar Fuik hateten bazeia ba planu mestre ne’e katak tinan ne’e sei estabelese baze militár ne’ebé kompostu husi kuartél ba militár no rezidénsia ba militár ne’ebé ho nia família sira bele hela. No, baze ne’e, kategoria nível kompañia móvel ne’ebé konstitui Batallaun Brigada ho nia postu tátiku.
“Tuir planu mestre ne’e, ita sei konstrui uma ba militár sira hamutuk 120. Hotu-hotu sei hela ho nia família iha baze militár ne’ebé ita atu konstrui,” nia esplika.
Nia hatutan, bazeia ba planu, Ministériu Defeza sei konstrui baze militár tuir definisaun dispozitivu forsa nian katak sei konstrui batallaun ida iha norte, batallaun ida iha súl no batallaun espesiál ida.
“Ita sei konstrui baze militár ho batallaun ida iha zona norte no iha zona súl. Ita sei tau forsa fuzileira sira iha parte leste Baucau, Viqueque no Lautém inklui ida iha Hera depois abranze to’o Ataúro no Oé-Cusse,” nia konklui.
Iha seremónia lansamentu planu mestre ne’e, Ministru Klamar Fuik akompaña husi Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek, Vise Xefe Estadu Maiór Jenerál FALINTIL-Forsa Defeza Timor-Leste, Majór Jenerál Calisto dos Santos “Coliati”, Xefe Estadu Maiór F-FDTL, José da Costa “Trix”, hamutuk ho ofisiál superiór militár sira no funsionáriu kargu xefia Ministériu Defeza inklui tékniku Ministériu Obra Públika.
Jornalista: Natalino Costa
Editór: Xisto Freitas da Piedade